Qytai bala týýǵa shekteýdi alyp tastaýy múmkin, dep habarlady "Habar 24" telearnasy.
Cebebi el biligi osylaisha halyqtyń qartaiý qarqynyn báseńdetpekshi. "Bala tabýdyń erkindigi" atty jańa baǵdarlama jurttyń óz qalaýy boiynsha birneshe sábi súiýine jaǵdai jasaýy tiis. Bul jańalyqty qarapaiym qytailyqtar qalai qabyldady?
"Osy bir balamdy jetkizsem deimin. Ázirge ekinshisin josparlaǵan joqpyz. Óitkeni biz siiaqty úlken qalalarda turatyn otbasylar úshin birneshe bala ósirý qiyn. Jumystan bosamaimyz. Árine týýǵa shekteýdi alyp tastasa qoldaimyn", - dedi Beijiń qalasynyń turǵyny Li Tian.
"Bir otbasyǵa bir baladan" degen saiasat 1979 jyly qabyldanǵan. Ol qanshama ýaqyt boiy birneshe sábi súigisi kelgen otbasylardy aiyppul tóleýge, jasandy túsik jasatýǵa jáne balasyn tyǵyp ósirýge itermeledi. Araǵa qyryq jylǵa jýyq ýaqyt salyp, "Bir otbasyǵa bir baladan" saiasaty jeńildetilgen edi. Búginde Qytaidaǵy erli-zaiyptylar eki bala ósire alady.
"Meniń eki balam bar. Ulymdy 2016 jyly shekteýdi alyp tastaǵan soń kótergen edim. Ázirshe osy jetedi dep oilaimyn", - dedi Beijiń qalasynyń turǵyny Jin Iýi.
Sarapshy Sýn Jiannyń aitýynsha, jastar úilenýge, otbasyly bolsa da sábi súiýge asyqpaidy. Kópshiligi tabysty jumysqa ornalasýdy oilaidy, karera qýady. Sondyqtan úkimet tarapynan birneshe bala ósiretin erli-zaiyptyny qoldaityn baǵdarlama ázirlenip jatyr eken. Keleshekte qazirgi "eki bala" saiasatynan da tiimdi jobalar qabyldanbaq. Biraq búgingi jastardyń ómirlik ustanymy ózgermese ol baǵdarlama qanshalyqty nátije beredi, ázirshe belgisiz.
"Eki bala týýǵa ruqsat bergeli kóp ýaqyt ótken joq. Biraq kópshiligi bul saiasattyń nátijesi sonshalyqty jaqsy bolmaǵanyn aityp jatyr. Al statistikalyq málimet boiynsha, eki jyldaǵy nátije jaman emes. Máselen, ekinshi bala týý kórsetkishi osy ýaqyt aralyǵynda 30 paiyzdan 50 paiyzǵa artqan. Biraq tuńǵysh balasyn dúniege ákelgender sany azaiyp ketken", - dedi Qytai halyq ýniversiteti qoǵamdyq damýdy zertteý ortalyǵynyń professory Sýn Jian.
Qytai - álemdegi halqy eń kóp el. Biraq azamattarynyń basym bóligi qartaiyp bara jatqan memleket. Erlerdiń sany áielderden 30 millionǵa artyq. Óitkeni bir bala saiasaty artynda urpaq qaldyrǵysy kelgen jurtty tek ulǵa qushtar qyldy. Osynyń bári demografiialyq jaǵdaiǵa ǵana emes, eldegi jumys kúshine de áser etti. Endi osy máseleni sheshý úshin bala týýǵa shekteý bolmaidy. Naqty sheshim biyl nemese 2019 jyldyń basynda qabyldanýy múmkin.
