Qytaidyń úlken qalalaryndaǵy ekologiialyq ahýal ońala bastady, dep jazady Habar 24.
Bilik bul nátijege jylytý maýsymy kezinde kómirdi elektr qýatymen almastyrý arqyly qol jetkizdi. Qazir eldiń soltústik aimaqtaryndaǵy megapolisterde kórsetkish anaǵurlym jaqsarǵan. Osylaisha Qytai 2020 jylǵa deiin kómir paidalanýdy 60 paiyzǵa deiin azaitpaq.
Beijińde elektr qýatyn paidalanýdyń rekordtyq deńgeii tirkeldi. Qytai astanasynda onyń kólemi 17,8 mln kVt-ty qurady.
Mamandardyń aitýynsha, jylytýdy jappai elektr qýatyna kóshirýge bailanysty energetikalyq júktemege kúsh tústi. Qazirgi jylytý maýsymynyń eń qaýyrt shaǵynda toqty paidalaný ótken jylmen salystyrǵanda 11 paiyzǵa artyp otyr. Kómir jaǵýdy azaitqany aýa synamasynan da sezildi. Qalada qorshaǵan ortaǵa bólinetin ziiandy zattardyń mólsheri 35 paiyzǵa azaidy. Bul - sońǵy 5 jylda bolmaǵan kórsetkish.
«Kómir otynynyń ornyn toltyrý maqsatynda Qytai qazir balamaly energiia kózderin damytýǵa basty nazar aýdaryp otyr. 2010 jyldan bastap úkimet qorshaǵan ortanyń sapasyn baqylaýǵa aldy. Al úlken qalalarǵa aýanyń lastaný deńgeiin 10 paiyzdan asyrmaýy tiis degen tapsyrma júkteldi», - deidi Qalany damytý jáne qorshaǵan ortany zertteý ortalyǵynyń direktory Pan Tsziahýa.
Beijińdegi qatty otyn jaǵyp kelgen 1 millionnan astam turǵyn úi toqpen jylytý júiesine kóshirildi. Energetikalyq júktemeniń 40 paiyzy osy maqsatqa jumsalyp otyr. Megapolistegi ekologiialyq ahýaldyń jaqsarǵanyn turǵyndar da sezgenin aitady.
«Ótken jyldarmen salystyrǵanda biyl kók aspandy jiirek kóretin boldyq. Eshqandai maska kimei-aq, jumysqa kóńildi baramyn. Byltyr tútin kúnderi syrtqa shyqpaýǵa tyrysatynmyn, qazir olai emes», - deidi Beijiń qalasynyń turǵyny Tao Lian.
Beijiń qalasynyń qorshaǵan ortany qorǵaý basqarmasy sońǵy 2 jylda aýany tazartýǵa 4,5 milliard dollar jumsady. Jylytý júiesin elektr qýatyna kóshire almai otyrǵandarǵa tehnikalyq jáne materialdyq kómek jasady. Endi megapolistiń ákimshiligi 2018-2022 jyldarǵa arnalǵan jańa jospar ázirlep jatyr. Qazir Qytai eldiń soltústik aimaqtaryn birtindep elektr qýatymen qosa, tabiǵi gazǵa da kóshirmekshi.
