Qytai qalalarynda belgisiz virýs tarap jatyr, jeksenbi kúni 140 adam juqtyrǵany málim boldy, dep habarlaidy Qytai biligi. Pnevmoniiaǵa uqsas dertke shaldyqtyratyn virýstyń qaidan shyǵyp jatqany belgisiz. 2002 jyly osyǵan uqsas virýstan Qytai men Gonkongte 600-den astam adam ólgen.
Qytaidyń ortalyǵyndaǵy Ýhan qalasynyń syrtynda úsh adamnyń virýs juqtyrǵany anyqtalǵan.
Pekinde qurylǵan densaýlyq saqtaý boiynsha ulttyq komissiia qańtardyń 25-ine bastalatyn Qytai jańa jylyn merekeleý kezinde saqtyq sharalaryn qatań júzege asyrýǵa shaqyrdy. Komissiia ázirge jaǵdaidyń baqylaýdy turǵanyn málimdedi. Zertteýshiler virýsty anyqtaýǵa kirisken. Dert belgileri negizinen ótken aidyń sońynda Ýhan qalasynyń shetindegi azyq-túlik bazaryn aralaǵandar men sonda jumys isteitinderden baiqalǵan.
Virýstyń qandai jolmen juǵatyny ázirge anyqtalmaǵan. Sarapshylardyń sózinshe, virýs adamǵa janýarlardan juǵýy múmkin, adamnan adamǵa juǵý múmkindigi de joqqa shyǵarylmaidy. 19 qańtarǵa deiin Ýhan qalasynda 198 adam aýyryp, úsh adam ólgen. Tailandta bir, Japoniiada bir adamnyń virýs juqtyrǵany jaily aqparat tarady.
Ulybritaniia sarapshylarynyń aitýynsha, virýs juqtyrǵandar resmi málimettegiden áldeqaida kóp bolýy múmkin.
18 qańtardan beri AQSh-tyń San-Frantsisko, Los-Andjles jáne Niý-Iork qalalarynyń áýejailary Qytai ortalyǵynan keletin áýe resiteriniń jolaýshylaryn tekserýdi bastady.
