Aqtóbe irgesindegi Jańaqonys-4 aýylynyń turǵyndary 2018 jyldan beri gazsyz otyr, - dep habarlaidy Tengrinews.kz tilshisi "Astana" telearnasyna silteme jasap.
Jańaqonys-4 aýylynda turǵyn úi salýǵa jer 2018 jyldan beri berile bastaǵan. Kezektegilerge 1500 oryn berilgen. 100-den asa úi salyndy, biraq kommýnikatsiianyń joqtyǵynan kóbi aýylǵa kóshýge qorqady.
Úsh balaly Jánibekovter otbasy Aqtóbede jaldamaly páterlerde turǵan, biraq baǵanyń kóterilýine bailanysty aýyldaǵy úilerine kóshýge májbúr bolǵan.
"29 qyrkúiekte gaz beremiz dep ýáde berdi, biraq ol merzim ótip ketti. Kishkentai balalarmen qysta qaitemiz? Bólmelerde kúni boiy jylytqyshtar qosylyp tur, elektr jaryǵyna 10 myńnan asa tóleimiz!" - deidi turǵyn Rysbek Jánibekov.
Bul máseleni halyq talai ret kótergen. Sońǵy ret qyrkúiektiń aiaǵyna deiin aýylǵa gaz tartylady dep sendirgen, biraq ol oryndalmady. Ashynǵan turǵyndar oblys ákimdigine kelip, túsinikteme talap etti.
Sheneýnikter ashýǵa býlyqqan turǵyndarǵa bir saǵattan soń ǵana shyqty. Olar biyl 229 million teńgege gaz qubyry qurylysy bastalǵanyn habarlady. Nysan daiyn dese de bolady, biraq qural-jabdyqtardyń jetkizilýindegi aqaýlar saldarynan úilerge der kezinde gaz tartý múmkin bolmaǵan. Merdigerler ázirge 200 gaz retteý blogyn kútip otyr.
"Kidiris boldy, sebebi bul tehnika Reseide shyǵarylady jáne jetkizýde qiyndyqtar týdy. Olarǵa tapsyrys berildi, kelesi aptada, jumaǵa deiin jetýi kerek", - dedi Aqtóbe qalalyq turǵyn úi-kommýnaldyq sharýashylyq bóliminiń basshysy Ádilbek Tankiev.
Ákimdik kógildir otyn qazannyń ortasyna deiin qosylady dep sendirdi.
