QR Mádeniet jáne sport vitse-ministri Serik Jarasbaev Beijińde ótetin XXIV Qysqy Olimpiada men Paralimpiadada júlde alǵan sportshylarǵa qansha syiaqy beriletinin aitty, dep habarlaidy QazAqparat.
«Júldeli oryn alǵan olimpiadashylar men paralimpiadashylar (1-6 oryn) aqshalai syiaqy alady. Zańda qarastyrylǵandai, jeńip alǵan medaldarǵa qarai páter de bólinedi. Birinshi oryn úshin – 250 myń dollar, odan keiin – 150 myń jáne 75 myń dollar syiaqy bekitilgen. Medal jeńip alǵan jaǵdaida, bul qarajat QR Memlekettik rezervinen tólenedi», - dedi Serik Jarasbaev Ortalyq kommýnikatsiialar qyzmetinde ótken baspasóz máslihatynda.
Brifing barysynda vitse-ministr paralimpiada oiyndarynda daiyndyq týraly aityp berdi.
«Paralimpiadashylarǵa olimpiadashylar siiaqty birdei kóńil bólý kerek. Olimpiadashylardy shyǵaryp salý kezinde Prezidenttiń qabyldaýynda eki paralimpiadashy boldy. Paralimpiada oiyndarynda sportshylarymyz birneshe ese az – oǵan 4 adam ǵana qatysady,onyń ekeýi shańǵy sportynda jáne ekeýi biatlonda. Daiyndyq qyzý júrip jatyr. 5-25 aqpanda sportshylar oqý-jattyǵý jiynyna – «Alataý» shańǵy-biatlon keshenine barady. Paralimpiada komitetimen barlyq máseleler pysyqtaldy. Olardyń sany áldeqaida az bolǵandyqtan, bar másele jyldam sheshiledi. Biz olarǵa sáttilik tileimiz», - dedi Jarasbaev.
