QR Mádeniet jáne sport vitse-ministri Serik Jarasbaev Beijińde ótetin XXIV Qysqy Olimpiadaǵa boljam týraly suraqtarǵa jaýap berdi, dep habarlaidy QazAqparat.
«Qazaqstan Qysqy Olimpiadadan jalǵyz medalmen qaitýdy dástúrge ainaldyrdy. Bul joly da bir medal alsaq, jetistik pe álde sátsizdik pe?», - dep suraq qoidy jýrnalist Ortalyq kommýnikatsiialar qyzmetinde.
«Árine, ár Olimpiadaǵa barǵan saiyn júldeden úmittenemiz. Bir medal bolsyn, eki medal bolsyn, bári júlde. Ol sportshylarymyz búkil ómirin arnaǵan, qan-terin tókkenniń nátijesi. Jalpy Táýelsizdik alǵannan beri qysqy oiyndarda 8 medal alǵanbyz. Onyń tórteýin bir ǵana adam alǵan. Sondyqtan, qandai medal alsaq ta, jetistik dep aitýǵa bolady», - dep jaýap berdi S. Jarasbaev.
Spiker jalpy qysqy sport túrin damytýǵa airyqsha nazar aýdarý qajet deidi. Olimpiada aiaqtalǵan soń, 25 aqpanda ministrlik pen Úkimet tarapynan keńeitilgen keńes ótedi. Sonda búkil suraq qarastyrylyp, qai baǵytta jumys isteý kerektigi aiqyndalady.
«Medaldarǵa boljam aitý óte qiyn, sońǵy eki jarym jyl boiy búkil álemde pandemiia bolyp jatyr. Biraq bizdiń sportshylarymyz bar kúshin salyp, óz joǵary nátijelerine jetedi degen senimdemiz», - dedi vitse-ministr.
Aita keteiik, XXIV qysqy Olimpiada oiyndary Qytaidyń Beijiń qalasynda, 2022 jyldyń 4 men 20 aqpan aralyǵynda ótedi. Onda jalpy sany 109 medal sarapqa salynady. Jarystar Beijiń qalasynan bólek qasyndaǵy Iantsin jáne Chjiantsziakoý qalalarynda da ótedi.
