Tótenshe jaǵdai departamentiniń mamandary elordada qar basýy múmkin 16 ýchaskeni anyqtady, dep habarlaidy "Ult aqparat".
«29 qyrkúiekte tótenshe jaǵdailar jónindegi komissiia otyrysy ótkizilip, tótenshe jaǵdai týraly másele qaraldy. Sol otyrysta qalany qar basatyn 16 ýchaske anyqtaldy. Olardyń ahýaldyq kartasy jasalyp, departamenttiń taralatyn kúsh-quraldary quraldy. Qazir Nur-Sultan qalasynyń tótenshe jaǵdailar departamentiniń jeke quramynda 221 adam bar. 14 táýlikke jetetin janar-jaǵarmai daiyndaldy. Sonymen qatar azyq-túlik qory tolyq kólemde qamtamasyz etildi», - dedi Nur-Sultan qalasy TJD bastyǵynyń orynbasary Esen Baiyrov qala ákimdiginiń Facebook paraqshasynda ótken onlain baspasóz máslihatynda.
Departament ókiliniń aitýynsha, astanada qarda ótimdiligi joǵary 43 tehnika toby qurylǵan.
«Departamenttiń tehnikasy trospen, elektr generatorlarmen jabdyqtaldy. Qazirgi ýaqytta tabiǵi jáne tehnogendik sipattaǵy tótenshe jaǵdailardyń qaýpin joiý boiynsha ákimniń sheshimimen departamentten 2514 adam jáne 530 qutqarý, injenerlik tehnikasy, 28 quramadan turatyn azamattyq qorǵaý qurylymy bekitildi. «Astana – Tazalyq» kásipornynyń bazasynda 17 myń tekshe metr qum-tuz qospasy jáne kóktaiǵaqqa qarsy 407 tonna reagent daiyndaldy», - dedi ol.
