Qazaqstan Respýblikasynyń Prezidenti Qasym-Jomart Toqaevtyń tapsyrmasyna sáikes Memlekettik hatshy Qyrymbek Kósherbaev Aqordada bir top belgili bilim-ǵylym, densaýlyq saqtaý, mádeniet qairatkerlerine, óndiristik sala qyzmetkerlerine elimizdiń joǵary memlekettik nagradalaryn, sondai-aq ál-Farabi atyndaǵy ǵylym men tehnika salasyndaǵy memlekettik syilyq laýreattaryna diplomdar men tós belgilerdi saltanatty jaǵdaida tabystady.
Bul týraly Aqordanyń baspasóz qyzmeti málim etti.
Qyrymbek Kósherbaev Táýelsizdik elimizdi álemge azattyq súigish, rýhy biik, namysy berik halyq retinde tanytqanyn atap ótti.
– Týǵan halqynyń senimin arqalaǵan Elbasy men Qazaqstan egiz uǵymǵa ainaldy. Nursultan Ábishulynyń bolashaqty boljap, keleshekti kóre bilgen kóregen saiasatynyń arqasynda Táýelsizdikpen birge qoǵamnyń tutastai jańasha oilaý júiesi qalyptasty. Táýelsiz Qazaqstannyń týyn tiktep, shekarasyn shegendep, álemdik arenada óz ornyn oiyp turyp alýyna Tuńǵysh Prezident – Elbasy Nursultan Ábishuly Nazarbaev eren eńbek sińirdi. Al Memleket basshysy Qasym-Jomart Kemeluly Toqaev Elbasy qalyptastyrǵan dańǵyl joldy «Sabaqtastyq, Ádilet, Órleý» printsipterimen laiyqty jalǵastyryp keledi. «Halyq únine qulaq asatyn memleket» tujyrymdamasyn iske asyryp, elimizdiń odan ári damýyn qamtamasyz etip otyr. Osylaisha, biz qysqa merzimde ǵasyrǵa para-par jasampazdyq jolyna túse bildik, – dedi Memlekettik hatshy.
Qyrymbek Kósherbaev osy otyz jylda Qazaqstannyń jańa kelbeti qalyptasqanyn, memleketimiz jańǵyryp, halqymyzdyń qaita túlegenin aitty. Taǵdyry ortaq, tutastyǵy myqty kópultty halqymyzdyń tatýlyǵyn saqtaý búgingi kúnniń basty maqsaty ekenine toqtaldy.
– Ulysymyz úshin ulyq, memleketimiz úshin mártebeli mereke – Táýelsizdiktiń 30 jyldyǵy qarsańynda Qazaqstan Respýblikasynyń Prezidenti Qasym-Jomart Kemeluly Toqaev elimizdiń qoǵamdyq-saiasi, áleýmettik-ekonomikalyq damýyna erekshe úles qosyp júrgen Sizderdei azamattardy joǵary memlekettik nagradalarmen marapattady. Bul – Sizderdiń jyldar boiy atqarǵan tynymsyz eńbekterińizge berilgen zor baǵa, – dedi Qyrymbek Eleýuly.
Jiyn sońynda Memlekettik hatshy marapat ielerine joǵary memlekettik nagradalary men syilyqtaryn tabystap, aldaǵy jumystaryna tabys tiledi.
