Qazaqstandyqtar halyq sanaǵyna qatysýdyń balamaly nusqasyna ie bolady.
Endi, tek sanaq júrgizýshige aqparat berip qana qoimai, sonymen qatar onlain rejiminde jumys isteitin mamandandyrylǵan portal qyzmetin qoldana alady.
Biylǵy sanaqtyń ereksheligi qandai, nendei jańashyldyq bolady? Úkimettiń bul aýqymdy naýqanǵa daiyndyǵy qandai? Osy jáne ózgede jáne máseleler Qazaqstan Respýblikasynyń 2021 jylǵy Ulttyq halyq sanaǵyn júrgizý jónindegi arnaiy komissiiasynyń birinshi otyrysy barysynda sóz boldy, dep habarlaidy QazAqparat.
Reformalar jónindegi Joǵarǵy keńeste Memleket basshysynyń tapsyrmasy boiynsha Premer-Ministrdiń birinshi orynbasary Álihan Smaiylovtyń tóraǵalyǵymen arnaiy komissiia quryldy. Ol naýqanǵa daiyndyq pen ony ótkizýdiń negizgi uiymdastyrýshylyq jáne mazmundyq máselelerimen ainalysady. Halyqtyń sany, onyń jasy, genderlik quramy, ýrbanizatsiia dárejesi, tabys deńgeii týraly jinaqtalǵan málimetter tekserilgen, pysyqtalǵan basqarýshylyq sheshimder qabyldaýǵa negiz bolady.
Onlain sanaqty 2021 jyldyń 1 qyrkúieginen bastaý týraly sheshim qabyldandy. Ol 2021 jyldyń 15 qazanyna deiin mamandandyrylǵan sanaq.gov.kz veb-saitynda jalǵasady. Sait táýlik boiy ashyq bolady. Azamattar, qai jerde júrse de, ózi jáne otbasy úshin saýalnama betterin toltyryp, sanaqqa óz betinshe qatysa alady.
Aqparattyq qaýipsizdikti qamtamasyz etý maqsatynda Ulttyq statistika biýrosy «Kibershabýyldardy taldaý jáne tergeý ortalyǵy» ZTB-men birlesip jumystar júrgizdi. Nátijesinde osaldyq júiesi kúsheitildi jáne bailanys arnasy keńeidi.
Á.Smaiylovtyń uiǵarymymen, Qazaqstan Respýblikasynyń UQK-men birlesip, hakerlik shabýyldardyń aldyn alý maqsatynda halyq sanaǵy boiynsha aqparattyq resýrstarǵa táýlik boiy monitoring júrgizýdi qamtamasyz etý tapsyryldy. Sondai-aq, Premer-Ministrdiń birinshi orynbasary «sanaq.gov.kz» saityn «Egov.kz» veb-portalymen biriktirý qajettiligin atap ótti.
Dástúrli úi-úidi aralaý, onlain-sanaqtan ótpegen azamattardy qamtý maqsatynda 2021 jyldyń 1 qazanynan 2021 jyldyń 30 qazanyna deiin qajetti sanitarlyq normalardy saqtai otyryp ótkiziledi.
Sanaq júrgizýshiler planshetterdi qoldanady, bul derekter sapasyna adami faktordyń áserin barynsha azaitady, JSN qoldanyp naqtylyq deńgeiin joǵarylatady jáne aqparattyń qaitalanýyn boldyrmaidy.
Planshetke arnalǵan mobildi qosymsha ázirlendi, onyń kómegimen suhbat berýshi barlyq kiriktirilgen arifmetikalyq jáne logikalyq basqarýlardy eskere otyryp saýalnama júrgize alady, jikteýishter men anyqtamalyqtardy qoldana alady. Alynǵan derekter tikelei ortaq derekqorǵa jiberiledi.
