28 qańtarda Bishkektiń Pervomai aýdandyq soty Qyrǵyzstannyń burynǵy premer-ministri Mýhammedkalyi Abylgazievke bultartpas sharasyn qoldaný týraly ótinishti qarap, ony eki aiǵa qamaý týraly sheshim shyǵardy. Bul týraly Azattyqtyń Qyrǵyz qyzmeti habarlady.
Úkimettiń burynǵy jetekshisiniń advokaty Daniiar Erkimbaev sot sheshimimen kelispeitinin aityp, sheshimdi apelliatsiiaǵa beretinin habarlady.
Abylgaziev "Jemqorlyq" jáne "Zańsyz baiý" baptary boiynsha qylmystyq iste kúdikti retinde tanylǵan. Ol 26 qańtarda ustalǵan.
Byltyr qazan aiynda qarjy politsiiasy koronavirýs indeti kezinde shetelden kelgen gýmanitarlyq kómekti úlestirý isi aiasynda odan suraq-jaýap alǵan. Tergeýden keiin ol úkimet jetekshisi bolyp turǵan kezde zań buzbaǵanyn aitqan.
Mýhammedkalyi Abylgaziev ministrler kabinetin 2018 jyldyń 20 sáýirinen bastap 2020 jyldyń maýsymyna deiin basqarǵan. Byltyr "radiojiilikti zańsyz satý isi" boiynsha daý týyndaǵan shaqta qyzmetinen ketken.
