Bishkektiń Pervomai aýdandyq soty 2 maýsymda eldiń burynǵy premer-ministri Ómirbek Babanovqa bultartpas sharasyn qoldaný týraly sheshim qabyldady. Ol ulttyq qaýipsizdik jónindegi memlekettik komitettiń tergeý izoliatoryna eki aiǵa qamaldy. Bul týraly Azattyqtyń Qyrǵyz qyzmeti habarlady.
Buǵan deiin sýdia eks-premerdiń zańdy ustalǵanyn atap ótip, qorǵaý tarabynyń sýdiany aýystyrý týraly ótinishin qanaǵattandyrmaǵan.
Babanovtyń ózi taǵylǵan aiyptardy "sandyraq" dep ataǵan.
31 mamyrda memlekettik UQK burynǵy premer-ministr Ómirbek Babanovty ustaǵan. Komitettiń baspasóz qyzmetiniń habarlaýynsha, oǵan "Qumtór" jobasymen bailanysty jemqorlyq baby boiynsha aiyp taǵylǵan.
"Qumtór isi" boiynsha sonymen birge Jogorký keńesh depýtattary Asylbek Jeenbekov, Torobai Zýlpýkarov, eks-depýtattar Ysqaq Pirmatov pen Talantbek Ýzakbaev ta ustaldy. Olar da eki aiǵa qamalǵan.
"Respýblika" partiiasynyń qurýshysy jáne eks-lideri Babanov 2011-2012 jyldary Qyrǵyzstan premeri bolǵan. 2017 jyly prezident sailaýyna qatysyp, ekinshi oryn alǵan. Sailaýdan soń ol saiasi karerasyn aiaqtaitynyn aityp, Máskeýge ketken edi. 2019 jyly tamyzda ol Qyrǵyzstanǵa oralǵan.
Babanov Qyrǵyzstanǵa kelgen soń UQK men qarjy politsiiasyna birneshe ret tergeýge shaqyrylǵan. 2020 jyly 29 tamyzda kezekti tergeýden keiin ol Azattyqtyń Qyrǵyz qyzmetine "segiz qylmystyq is boiynsha jaýap berip jatqanyn" aitqan. Biyl naýryzda UQMK Babanovqa qatysty qozǵalǵan is toqtatqanyn, ol memleketke qoldaý retinde 100 mln som aýdarǵanyn málimdegen.
