Qyrǵyzstanda ótken táýlikte 470 adamnyń Covid infektsiiasyn juqtyrǵany anyqtaldy. Elde koronavirýs aýrýyna shaldyqqandardyń jalpy sany 51 490-ǵa jetti. Bul týraly Qyrǵyzstannyń koronavirýspen kúres jónindegi respýblikalyq shtaby habarlady.
Keiingi aptada infektsiia juqtyrǵandardyń táýliktik kórsetkishi 1,5 ese ósken. Ótken aptanyń senbisinde 307 naýqas anyqtalǵan.
Keiingi aptada koronavirýs juqtyrǵany anyqtalǵan naýqastar sany mynadai:
10 qazan – 307
11 qazan – 306
12 qazan – 298
13 qazan – 343
14 qazan – 330
15 qazan – 388
16 qazan – 431
17 qazan – 470
Koronavirýstyń órshýi 4 qazanda ótken Jogorký Keńesh sailaýynan keiingi tolqýmen tuspa-tus keldi. Kelesi kúni sailaý nátijesi shyǵyp, bilikke jaqyn degen partiialar jeńimpaz atanǵanda oppozitsiialyq partiialar men olardyń jaqtastary daýys berý nátijesi burmalanǵan dep narazylyqqa shyqty. 6 qazanǵa qaraǵan túni demonstranttar prezident pen parlament otyratyn «Aq úi» rezidentsiiasyn basyp alyp, túrmede jatqan saiasatkerlerdi kúshpen bosatyp aldy. Tolqýdyń sońy el prezidenti Sooronbai Jeenbekovtiń otstavkaǵa ketýine ákeldi. Eldi basqarý mindetin sailaýdan keiingi tolqý kezinde jaqtastary túrmeden bosatyp alǵan Sadyr Japarov atqaryp otyr. Munyń aldynda ǵana el parlamenti ony premer-ministr etip sailaǵan.
Tolqý bastalardyń aldynda 4 qazan kúni elde 207 koronavirýs naýqasy anyqtalǵan. Djons Hopkins ýniversitetiniń dereginshe, elde barlyǵy 51 myń adamnyń Covid infektsiiasyn juqtyrǵany rastalǵan. Qyrǵyzstan 17 shildeden bastap Covid pen PTR testimen rastalmaǵan koronavirýs pnevmoniiasy derekterin biriktirip sanap otyr.
