26 qarasha Qyrǵyzstanda jańa Konstitýtsiia jobasyn talqylaǵan konstitýtsiialyq keńestiń jiynynda aǵylshyn tiline resmi til mártebesin berý usynysy aityldy. Bul aqparatty Azattyqtyń Qyrǵyz qyzmeti habarlady.
Keńes múshesi, azamattyq belsendi Maksat Shakievtiń aitýynsha, orys tili arqyly Qyrǵyzstan onnan astam memleketpen qarym-qatynas jasai alady, al aǵylshyn tili ekinshi resmi tilge ainalsa, júzden astam memleketpen tyǵyz qatynas ornatyp, áreket etýge jol ashylady.
"Dúniejúzinde júzden astam elde, damyǵan memleketterde aǵylshyn tili keńinen qoldanylady. Qazirgi zamanǵy tehnologiialarǵa, halyqaralyq protsesterge aralasqymyz kelse, aǵylshyn tilin ekinshi resmi til retinde engizý máselesin talqylaý týraly tapsyrma berý kerek" dedi ol.
Bul usynysqa qyrǵyz memlekettik ýniversitetiniń manastaný jáne lingvistika institýtynyń direktory, professor Syrtbai Mýsaev qarsy shyqty.
"Bul máseleni usynys qylyp aitýdyń ózi - absýrd. Olai bolsa, qytai tilin de, aǵylshyn tilin de, arab, nemis tilderin de resmi til dep kórseteiik. Aqylǵa syimaityn dúnie. Bárimizdiń maqsatymyz da, tilegimiz de bir ekenin túsinemin. Biraq maqsatqa jetý úshin ulttyq múddeni qurbandyqqa shalmaý kerek. Maqsatqa jetý úshin ult múddesin ózgelerge jyǵyp berýdiń qajeti joq" dedi ol.
Jogorký keńesh jańa Konstitýtsiia jobasyn 17 qarashada qoǵam talqylaýyna shyǵarǵan. Sony talqylaý úshin konstitýtsiialyq keńes jasaqtalǵan.
Qyrǵyzstanda qyrǵyz tili - memlekettik, orys tili resmi til mártebesine ie.
