Qyrǵyzstan Reseige Bishkekten 25 sotyq jerdi 49 jylǵa jalǵa bermekshi. Bul týraly kelisimdi 13 maýsymda el parlamenti – Jogorký keńeshtiń halyqaralyq ister, qorǵanys, qaýipsizdik jáne kóshi-qon komiteti maquldady, dep habarlaidy Azattyq.
Memlekettik múlikti basqarý jónindegi qordyń tóraǵasy Mirlan Bakirov keltirgen derekter boiynsha, Bishkektegi Jibek joly dańǵyly men Kerimbekov kóshesindegi eki jer telimine Resei federaldyq shekara qyzmetine (FPS) arnalǵan ǵimarattar men ózge de nysandar salynbaq. Buryn "Global Invest" ashyq aktsionerlik qoǵamyna tiesili bolyp kelgen bul jer telimderin FPS jeke tulǵadan satyp alǵan. Resei taraby Qyrǵyzstan biliginen jyljymaityn múlikke ieligin zańdastyryp berýdi ótingen.
"Olar jeke tulǵalarmen kelisim jasap, múlikti alǵan. Qyrǵyzstan endi bul jer telimderin kadastrge tirkep, olarǵa memlekettik mártebe berip, uzaq merzimge jalǵa beredi, al múlik [Reseidiń] jeke menshigine ainalady" dep túsindirdi Mirlan Bakirov.
Onyń sózinshe, 1999 jyly Qyrǵyzstan men Resei arasynda shekara qyzmetteriniń yntymaqtastyǵy týraly kelisim jasalǵan. Osy qujatqa sáikes, Qyrǵyzstan reseilikterge Shý oblysy Novopokrovka aýylyndaǵy ǵimaratty shekarashylardyń paidalanýyna bergen. Biraq onda qajet jaǵdai bolmaǵandyqtan, Resei federaldyq shekara qyzmeti Bishkektegi Jibek joly dańǵyly men Kerimbekov kóshesinen eki jer telimin satyp alǵan.
Komitettegi jiyn kezinde Jogorký keńesh depýtaty Cholpon Sýltanbekova Qyrǵyzstanda shet memlekettiń áskeri qyzmetkerlerine múlik berý qaýipti ekenin aitty.
Qazir Resei Qazaqstannan 2050 jylǵa deiin jalǵa alǵan Baiqońyr qalasy men ǵarysh ailaǵyn paidalanyp otyr. Baiqońyr qalasy 2050 jylǵa deiin Reseidiń federaldyq mańyzy bar qalasy sanalady. Biyl 10 naýryzda Resei kúshteri Ýkrainaǵa basyp kirgennen keiin internette Baiqońyrdy Qazaqstanǵa qaitarýdy talap etken onlain petitsiia jariialanǵan.
