Qyrǵyzstan Prezidenti Sooronbai Jeenbekov eldegi jaǵdaiǵa bailanysty málimdeme jasady, dep habarlaidy Kabar agenttigi.
Prezident apparatynyń aqparattyq saiasat bóliminiń málimetinshe, úndeýde birqatar máseleler qamtylǵan. "Ult aqparat" málimdemeniń mátinin jariialaidy.
«Qurmetti otandastar!
Kei saiasatkerlerdiń shekten tys keýdemsoqtyǵynyń kesirinen bizdiń azamattardyń beibit tirshiligi men el tynyshtyǵyna qaýip tóndi.
Saiasi urandarmen qatar, eldiń birligi men qoǵamnyń tynysh ómirin buzýǵa shaqyratyn provokatsiialyq úndeýler de boldy.
Qyrǵyzstan qaýip-qater sheginde tur.
Qymbatty qyrǵyzstandyqtar, halqymyzdyń beibit tirshiligi saiasi oiynnyń qurbanyna ainalmaýy tiis. Mine, sol úshin el astanasy Bishkekte tótenshe jaǵdai rejimi engizildi.
Búgin men sol týraly tiisti jarlyqqa qol qoidym.
Konstitýtsiialyq quziretimniń aiasynda men azamattardyń tynysh ómiri men eldiń birtutastyǵyn saqtaý úshin qolymnan kelgenniń bárin jasaimyn. Eldiń búkil deni saý kúshi meni tolyq qoldaidy dep senemin. Búgin biz memlekettigimizge shynaiy qater tóngenin kórip otyrmyz. Sondyqtan shette qur qarap turmai, osy qiyn kúnderden birge shyǵaiyq.
Jaratqan halqymyzǵa jáne súiikti Qyrǵyzstanymyzǵa jar bolsyn».
