2021 jyldyń 28-29 sáýiri aralyǵynda qyrǵyz-tájik shekarasynda bolǵan jaǵdaiǵa bailanysty Qyrǵyzstannyń Syrtqy ister ministri Rýslan Qazaqbaev Tájikstan Syrtqy ister ministri Sirodjiddin Mýhriddimen kelissóz júrgizdi, dep habarlaidy Qyrǵyzstannyń Kabar agentttigi.
Kelissóz barysynda taraptar eki eldiń shekarasynda bolǵan jaǵdaidy retteýge qatysty birlesken qimyldardy talqylady.
Qyrǵyzstan Syrtqy ister ministrliginiń habarlaýynsha, eki eldiń syrtqy ister vedomstvolarynyń ókilderi eki taraptan da kisi ólip, adamdardyń jaraqattanýyna alyp kelgen shielenisti jaǵdaidy saiasi diplomatiialyq quraldardy qoldana otyryp, beibit túrde retteý kerektigin atap ótti.
Ministr Qazaqbaev qyrǵyz tarapynyń ózge eldiń jerine kóz tigip otyrmaǵanyn jáne óz eliniń jerin de eshkimmen bólispeitinin atap ótti. Osy rette ol shekaradaǵy barlyq sharýashylyq máseleler qyrǵyz-tájik shekarasyn delimitatsiialaý men demarkatsiialaý jónindegi úkimet delegatsiialary aiasyndaǵy joǵary ókilderdiń qatysýymen kelissózder barysynda sheshilýi qajettigine nazar aýdardy.
Sondai-aq ol eki el arasyndaǵy senimdi ásirese shekaraǵa jaqyn jerde nyǵaityp, shekaralas aýdandarda qaýipsizdik pen turaqtylyqty qamtamasyz etýmen bailanysty sharalardy qolǵa alý kerektigine nazar aýdaryp, jergilikti halyqtardyń arasyndaǵy shielenisti qozdyrýǵa degen kez kelgen umtylystyń jolyn kesý kerektigin aitty.
Birneshe kólissózderdiń barysynda QR men TR arasynda saǵat 20:00-den bastap, atysty tolyq toqtatý jáne áskerdi aimaqtan alyp ketý týraly kelisim jasaldy.
Sonymen qatar taraptar jaqyn arada eki taraptyń jergilikti atqarýshy organdary ókilderiniń qatysýymen quqyq qorǵaý jáne kúsh-qýat qurylymdary basshylarynyń bólek kezdesýin uiymdastyrý jóninde kelisti. Basqosýda shekarada qalyptasqan jaǵdaidy retteýdiń ózge de jáittary sóz bolady.
Jaǵdaidy retteýdiń odan ári sharlary retinde taraptar ózara aqparattyq-túsindirý jumystaryn kúsheitýge kelisti.
R.Qazaqbaev pen S.Mýhriddin eki tarapty da arazdastyrýshy kúshterdiń qiturqy áreketterine berilmeýge shaqyrdy.
