Qyrǵyzstannyń Batken oblysynda qyrǵyz-tájik memlekettik shekarasyn delimitatsiialaý jáne demarkatsiialaý boiynsha Qyrǵyzstan men Tájikstan úkimettik delegatsiialarynyń otyrysy ótti, dep habarlaidy "Ult aqparat".
Qyrǵyzstandyq Kabar agenttiginiń habarlaýynsha, Qyrǵyz Respýblikasynyń delegatsiiasyn Ulttyq qaýipsizdik memlekettik komitetiniń tóraǵasy Qamshybek Tashiev, Tájikstan Respýblikasynyń delegatsiiasyn Ulttyq qaýipsizdik memlekettik komitetiniń tóraǵasy Saimýmin Iatimov basqardy.
Kezdesý barysynda eki tarap qyrǵyz-tájik memlekettik shekarasyndaǵy jaǵdaidy retteýge baǵyttalǵan ári qaraiǵy is-qimyldar boiynsha pikir almasty.
Kabar agenttiginiń málimdeýinshe, delegatsiia basshylary qyrǵyz-tájik memlekettik shekarasyndaǵy qaqtyǵysty beibit jolmen retteý qajettiligi týraly ózara túsinistik bildirdi.
Otyrys qorytyndysy boiynsha birlesken hattamaǵa qol qoiyldy.
Tájikstandyq Hovar agenttiginiń habarlaýynsha, Dýshanbede Tájikstan Respýblikasynyń prezidenti Emomali Rahmon men Qyrǵyzstan prezidenti Sadyr Japarovtyń kezdesýi ótedi. Memleket basshylary 30 sáýirde telefon arqyly sóilesý barysynda kelisti.
Áńgimelesý barysynda Memleket basshylary shekara mańyndaǵy aýdandardaǵy sońǵy qaqtyǵys oqiǵalar jóninde sóz qozǵap, tájik-qyrǵyz shekarasyndaǵy qalyptasqan jaǵdaidy talqylady.
Jaǵdaidy qalypqa keltirýge jáne onyń ýshyǵýyna jol bermeýge, atysty tolyq toqtatýǵa jáne belgilengen ýaqytta shekaradan áskerlerdi shyǵarýǵa baǵyttalǵan ýaǵdalastyqtardy oryndaýdyń erekshe mańyzdylyǵy atap ótildi.
Osy turǵyda prezidentter shekarany delimitatsiialaý jónindegi kelissózder protsesin odan ári ilgeriletý boiynsha tájik-qyrǵyz memleketaralyq dialogyn jalǵastyrýdyń mańyzdylyǵyna da nazar aýdardy.
Qyrǵyz Respýblikasynyń Batken qalasynda 1 mamyrda delimitatsiia jáne demarkatsiia máseleleri boiynsha Taraptardyń Úkimetaralyq komissiiasynyń otyrysyn ótkizý týraly ýaǵdalastyqtarǵa qol jetkizildi.
Aita keteiik, 28 sáýir kúni Qyrǵyzstan men Tájikstan shekarasynda eki el turǵyndary ózara kelispei, keiin Qyrǵyzstannyń Batken oblysy Batken aýdanynyń «Golovnoi» eldi mekeninde jaǵdai shielenise túskeni, el azamattary Isfara-Vorýh tasjolyn jaýyp tastaǵany habarlandy.
29 sáýirde Batken oblysyndaǵy qaqtyǵys aimaǵynan evakýatsiialanǵan qyrǵyzstandyqtardyń sany 848 adamdy qurady.
Osy kúni Qyrǵyzstan men Tájikstan saǵat 20:00-den bastap atysty toqtatý týraly kelisimge keldi.
