Foto: Ózbekstan Prezidenttiń baspasóz qyzmeti
Qyrǵyzstan men Ózbekstan eki el arasyndaǵy shekarany anyqtaý protsesin aiaqtady. 27 qańtarda Qyrǵyzstan prezidenti Sadyr Japarov ózbek áriptesi Shavkat Mirziiaevpen kezdesý kezinde osylai dep málimdedi. Mirziiaev osy aptada Bishkekke memlekettik saparmen kelgen. Bul týraly Azattyq radiosy habarlady.
Kezdesý kezinde Japarov pen Mirziiaev ózbek-qyrǵyz shekarasynyń jekelegen aýmaqtary týraly ratifikatsiia gramotalarymen almasty.
"Bul - shyn máninde tarihi oqiǵa. Biz dialogqa jáne shekara máseleleri boiynsha ózara tiimdi sheshimderdi izdeýge daiyn ekenimizdi kórsettik. Shekara máselelerine núkte qoiý arqyly biz bolashaq urpaqtyń turaqty damýy men gúldenýiniń irgetasyn qalaitynymyzǵa senimdimin" dedi Sadyr Japarov.
Mirziiaev shekarany belgileý máselesin tolyq retteý "ekijaqty qarym-qatynasty damytýda mańyzdy ról atqaratyny sózsiz, bul aimaqta turaqtylyq pen qaýipsizdikti nyǵaitýǵa kómektesedi" dedi.
Qyrǵyzstan men Ózbekstan eki el arasyndaǵy jan-jaqty strategiialyq yntymaqtastyq týraly deklaratsiiaǵa da qol qoidy.
Aita keteiik, Qyrǵyzstan men Ózbekstan arasyndaǵy shekaranyń uzyndyǵy - 1314 shaqyrym. Buǵan deiin shekaradaǵy daýly aimaqtarǵa bailanysty qaqtyǵystar jii bolǵan. Keibirinde adam ólimi de boldy. Byltyr qarashada Qyrǵyzstan jáne Ózbekstan biligi 30 jyl jalǵasyp kele jatqan shekara daýyna núkte qoiǵan.
Shekaradan bólek, buǵan deiin eki el Kempirabad sý qoimasyn birigip basqarý týraly kelisimge qol qoiǵan. Qyrǵyzstanda bul narazylyq týǵyzdy. Elde jappai tártipsizdik uiymdastyrdy degen kúdikpen 26 adam ustaldy. Arasynda jýrnalister men belsendiler bar. Sol tusta quqyq qorǵaýshylar ustalǵandardy bosatýdy talap etken.
Copyright (c) 2013. RFE/RL, Inc. Reprinted with the permission of Radio Free Europe/Radio Liberty, 1201 Connecticut Ave., N.W. Washington DC 20036.
