Qyrǵyzstan úkimeti álemde koronavirýstyń jańa túri jyldam taraýyna bailanysty saqtyq sharalaryn kúsheitti. Bul týraly 25 jeltoqsanda úkimettiń baspasóz qyzmeti habarlady.
Koronavirýspen kúres jónindegi respýblikalyq shuǵyl shtab qaýipsizdikti kúsheitip, shekarada sanitarlyq-epidemiologiialyq baqylaýdy qataitýdy tapsyrǵan.
25 jeltoqsan kúngi aqparat boiynsha, Qyrǵyzstanda koronavirýs juqtyrǵandar 80 025 adamǵa jetken, naýryzdan beri 1340 adam qaitys bolǵan.
Jaqynda Ulybritaniia Angliianyń ońtústik-batysy men Londonda 4-deńgeili lokdaýn engizgen. Ulybritaniia densaýlyq saqtaý uiymynyń málimetinshe, koronavirýstyń jańa túri virýstyń ádettegi túrine qaraǵanda 70 paiyz jyldam taraidy. Biraq dárigerler onyń adam ómirine asa qaýipti emes jáne vaktsinatsiiaǵa da áseri joq dep sanaidy.
Koronavirýstyń jańa túri Italiia, Niderland, Daniia, Avstraliia, Ońtústik Afrika, Nigeriia jáne ózge elderde anyqtalǵan.
