Qyrǵyzstan azamattarynyń Qazaqstanmen shekaradaǵy úsh shekara beketi - Talas oblysyndaǵy "Chon-Kapka", Shý oblysyndaǵy "Aq-Jol" jáne "Aq-Tilek" ótkizý pýnkterinen ótýi qiyndady. Bul týraly Qyrǵyzstan shekara qyzmetine silteme jasaǵan Azattyqtyń Qyrǵyz redaktsiiasy habarlady. Memlekettik shekara qyzmetiniń málimetinshe, jaǵdai 10 qazannyń keshinen beri ózgermei tur. Shekarada kisi qarasy men kólik sany kóbeigen. Qazaqstan biligi jaǵdaiǵa resmi túrde túsinik bermei otyr.
Shekaradan ótýdiń qiyndaǵanyn kýágerler de habarlap jatyr. "Chon-Kapka" beketine seisenbi kúni (10 qazan - red) saǵat 9-da bardyq, kúndizgi ekige deiin turyp, sol kúii óte almadyq. Keiin onda jiti tekserip, ár jarty saǵatta bir ǵana kólikti ótkizgenin estidik" dedi Azattyqqa Talas qalasynyń turǵyny Býrýlkan Beishenalieva.
11 qazanda Qyrǵyzstan shekara qyzmeti Qazaqstannyń shekaradan "kúsheitilgen tártipte" ótkizip jatqanyn habarlady. Sonymen qatar memlekettik shekara qyzmeti de 10 qazan kúngi saǵat 20-den beri "prezident sailaýyna daiyndyq pen ony ótkizý ýaqytynda" kúsheitilgen tártipke kóshken. Memlekettik shekara qyzmeti biraq Qyrǵyzstan jaǵynan shekaralyq tekserýden óterde shekteý joǵyn aitady.
10 qazan kúni keshke áleýmettik jeli qoldanýshylary "Qordai" tekserý jáne ótkizý beketinde tártip kúsheitilgen bolýy múmkin ekenin habarlaǵan. Qoldanýshylardyń habarlaýynsha, adamdar kezekte saǵattap turǵan, júk kólikteri muqiiat tekserilip jatyr. Kezekte turǵan keibir kisiler tekserýdiń kúsheigenin Qyrǵyzstan prezidenti Almazbek Atambaevtyń Qazaqstan basshylyǵyna qarata syn aitqanymen bailanystyrady.
Qyrǵyz prezidenti Almazbek Atambaev 7 qazanda Bishkek mańyndaǵy Ala-Archa memlekettik rezidentsiiasynda el azamattaryna memlekettik nagradalar tapsyrý rásiminde sóilegen sózinde Qyrǵyzstan prezidenti sailaýyna qatysyp jatqan jekelegen kandidattarmen birge Qazaqstan biligin de synaǵan. Atambaev kórshiles eldiń basshylyǵy men oligarhtary Qyrǵyzstandaǵy sailaýǵa kiligip otyrǵanyn málimdep, Qazaqstannyń keibir resmi tulǵalary Qyrǵyzstannyń burynǵy prezidenti Qurmanbek Bakievtiń otbasyna qoldaidy dep aiyptaǵan.
Tiisinshe, kúni keshe Qazaqstan premer-ministri qyrǵyz basshysynyń shýly málimdemesine jaýap bergen bolatyn.
