"Qazaqstannyń Qyrǵyzstanmen shekarasyndaǵy kezek joiyldy, tekserý jáne ótkizý beketterinde bir de bir kólik joq", - dep habarlaidy Azattyqtyń Qyrǵyz redaktsiiasy memlekettik shekara qyzmetine silteme jasai otyryp .
Vedomstvonyń málimetine qaraǵanda, beketterdegi kezek 4 jeltoqsan kúni aiaqtalǵan. Júk kóligi, jeńil kólikter men jolaýshy tasymaldaityn kólikter shekaradan qalypty rejimde ótkizilip jatyr.
Qazaqstan Qyrǵyzstanmen shekaradaǵy baqylaýdy qazannyń 10-ynan bastap kúsheitilgen rejimge kóshirgennen keiin kórshi elden Qazaqstan aýmaǵyna ótý qiyndap ketken edi. Astana shekarada tekserýdiń kúsheitilgenin "kontrabandamen kúres sharasy" dep túsindirgen. Bishkek Qazaqstan jaǵy shekarada "qoldan kedergi jasap otyr" dep málimdegen.
Kei sarapshylar Astananyń mundai sharasyn sol kezdegi Qyrǵyzstan prezidenti Almazbek Atambaevtyń "Qyrǵyzstannyń ishki isine aralasyp otyr" dep Qazaqstan basshylyǵyn synaǵan málimdemesimen bailanystyrǵan.
30 qarashada Qazaqstan prezidenti Nursultan Nazarbaev pen Qyrǵyzstan prezidenti Sooronbai Jeenbekov Minskide kezdesip, shekara máselesin talqylaǵan. Kezdesýden soń prezidentter shekaradaǵy jaǵdaidy retteitin "jol kartasy" jeltoqsannyń sońyna deiin qabyldanatynyn habarlaǵan. 2 jeltoqsanda eki el úkimetteri "jol kartasyna" qol qoiǵan. Qyrǵyzstan shekara qyzmeti keiin qazaqstandyq shekarashylar 3 jeltoqsanǵa qaraǵan túnnen bastap shekaradaǵy beketterde júk kólikterin ótkizýdi tezdetkenin habarlaǵan.
