Qyrǵyzstan Qazaqstandaǵy "Shubarkól" kenishinen kóbirek kómir tasymaldaityn bolady. Bul jóninde Qyrǵyzstannyń monopoliiany retteý agenttigi habarlady, dep jazady Azattyq.
Mekeme baspasóz qyzmetiniń habarlaýynsha, jaqyn kúnderi Qyrǵyzstanǵa 247 vagon kómir jetkiziledi. Bilik kómirdi halyqqa tonnasyn 4 myń 600 somnan (23,4 myń teńge nemese 54 dollar) artyq satpaýǵa ýáde berip otyr.
Qazaqstandyq kómir Bishkek, Shý oblysynyń Shopokov, Qaiyńdy, Toqmaq jáne Qant qalalarynda satylatyn bolady.
Qyrǵyzstanda sýyq túskeli beri kómir tapshylyǵy baiqalyp jatyr. Onyń ústine byltyrǵy jylmen salystyrǵanda kómir baǵasy 20% qymbattaǵan.
16 qarashada prezident Sadyr Japarov tonnasy 3 myń somnan aspaityn kómir satatyn oryndar ashýdy tapsyrǵan. Biraq bul uzyn-sonar kezek týǵyzyp, árbir satyp alýshyǵa eki tonnadan artyq kómir bermeitin boldy.
