Qyrǵyzstannyń ministrler kabineti Qazaqstannan gýmanitarlyq kómek retinde jetkizilgen undy satý týraly sheshim shyǵardy, dep habarlaidy "Ult aqparat".
QR TJM janyndaǵy Memlekettik materialdyq rezervter qory aqparatyna súiensek, buǵan deiin Jelide Qazaqstannan ákelingen unnyń saqtaý merzimi shekteýli ekeni týraly aqparat jariialanǵan. Qor bul aqparatty joqqa shyǵardy.
"2021 jyly mamyrda respýblikaǵa gýmanitarlyq kómek jelisi boiynsha Qazaqstan Respýblikasynan 10 myń tonna mólsherinde joǵary, birinshi surypty un kelip tústi. Ol barlyq sapalyq kórsetkish boiynsha EAEO jáne memlekettik standart normativtik qujattarynyń talaptaryna sáikes keledi. Baýyrlas halyq tarapynan bul kómek únemi, ásirese Qyrǵyzstan úshin qiyn ýaqytta kórsetiledi. Mysaly, 2020 jyly koronavirýs pandemiiasy ortasynda bes myń tonna mólsherinde un men gýmanitarlyq kómek kórsetildi", - delingen habarlamada.
Vedomstvo málimeti boiynsha, maýsym aiynan bastap Qyrǵyzstanda aýa temperatýrasy 32-35 gradýsqa deiin jáne odan joǵary kóteriledi, shildede aptap kútiledi. Bul qaptaǵy undy saqtaý sharttaryna teris áser etedi.
"Ministrler kabineti Qazaqstan Respýblikasynan kelgen gýmanitarlyq unnyń sapa kórsetkishteriniń nasharlaýyna jol bermeý maqsatynda osy undy satyp, odan túsken qarjyǵa memlekettik rezervke uzaq ýaqytqa saqtaý úshin azyq-túlik bidaiyn satyp alý, sol arqyly respýblikanyń azyq-túlik qaýipsizdigin qamtamasyz etý týraly sheshim shyǵardy", - dep túsindirdi qor ókilderi.
Eske salaiyq, mamyrda Prezident Qasym-Jomart Toqaev Qyrǵyzstanǵa gýmanitarlyq kómek kórsetýdi tapsyrǵan bolatyn.
