10 qazan kúni Qyrǵyzstan ulttyq qaýipsizdik jónindegi memlekettik komitet pen ishki ister ministrligi eldiń burynǵy prezidenti Almazbek Atambaevty ustady. Bul týraly qaýipsizdik komitetiniń baspasóz qyzmeti habarlady.
Atambaevpen birge onyń oqqaǵarlary Qanat Saǵynbaev pen Damir Musakeev te ustaldy.
Ulttyq qaýipsizdik komitetiniń málimetinshe, olar "Bishkektegi jappai tártipsizdikti uiymdastyrý faktisi jónindegi qylmystyq is aiasynda" ustalǵan. Qylmystyq ózge qatysýshylaryna izdeý salyndy delingen komitettiń baspasóz málimdemesinde.
Atambaev, Saǵynbaev jáne Musakeev úsheýi 6 qazanǵa qaraǵan túni parlament sailaýynan keiingi tolqý kezinde bosatylǵan. Olardy narazylyq bildirýge shyqqan azamattar kúshpen shyǵaryp alǵan. Sol kúni Almazbek Atambaevpen birge onyń toǵyz jaqtasy da osylai bosap shyqty. Burynǵy prezidenttiń advokaty Zamir Jooshev osy jóninde málimdeme jasap, Qoi-Tash oqiǵasy boiynsha sottalǵan Almazbek Atambaev pen ózge de azamattar sottyń 6 qazanyndaǵy sheshimi boiynsha 2020 jyldyń 11 qarashasyna deiin úiqamaqqa aýystyryldy dedi.
9 qazan kúni azamattyq belsendilerdiń Bishkektiń ortalyq alańyndaǵy mitingi kezinde tártipsizdik boldy. Aktsiia qatysýshylary Jogorký Keńeshtiń jedel jinalyp, legitimdi premer-ministrdi sailaýdy talap etti. Miting kezinde eldiń burynǵy prezidenti Almazbek Atambaev pen burynǵy premer-ministri Omýrbek Babanov sóz sóiledi.
Keiinirek miting ótip jatqan "Ala-Too" alańyna belgisiz bireýler kelip, tártipsizdik bastaldy. Kelgender Eski alańda miting ótkizip jatqan Sadyr Japarovtyń jaqtastary degen aqparat tarady. Alaida saiasatkerdiń advokaty Sharabidin Toktosýnov ortalyq alańdaǵy tártipsizdikke Japarov jaqtastarynyń qatysy joq dep, munyń arandatý ekenin aitty.
Qalanyń ishki ister departamenti "Jappai tártipsizdik" boiynsha (Qyrǵyzstan qylmystyq kodeksiniń 264-baby) qylmystyq is qozǵap, belgisiz avtokólikke oq atqan adamǵa izdeý saldy. Osy arada áleýmettik jelide Qyrǵyzstannyń burynǵy prezidenti Almazbek Atambaevtyń, burynǵy premer-ministrleri Sapar Isakov pen Omýrbek Babanovtyń kólikterine oq atylǵany týraly habar tarady.
