Qyrǵyzstan Joǵarǵy sotynyń konstitýtsiialyq palatasy zańger Nýrbek Toktakýnovtyń zańdaǵy eks-prezidentke tiisýge múldem bolmaityny týraly normany konstitýtsiiaǵa qaishy dep tanýdy suraǵan shaǵymyn qarady. Zańger Qyrǵyzstan prezidentiniń qyzmetine kepildik berý týraly zańnyń 12-babyn ("Qyrǵyzstan eks-prezidentine tiispeý") shaǵym túsirgen. Ol shaǵymynda eks-prezidentke múldem tiisýge bolmaidy degen normany joiýdy suraidy.
Toktakýnovtyń sózinshe, konstitýtsiialyq palata prezidentke tiispeý quqyǵyn berý konstitýtsiiaǵa qaishy, biraq tiispeý týraly normamen birge ondai quqyqtan aiyrý protsedýrasy da qarastyrylýy tiis dep jaýap bergen.
"Túsinikti qylyp aitsaq, olar "eks-prezidentke tiispeý týraly bap konstitýtsiiaǵa qaishy keledi, sebebi bul quqyqtan aiyrý protsedýrasy qarastyrylmaǵan" degen pikirde. Palata zańǵa eks-prezidentti tiispeý quqyǵynan aiyrý protsedýrasyn engizýdi depýtattar usynýy kerek dep, barlyq jaýapkershilikti Jogorký Keńeshke artyp otyr. Olar sonymen qatar bul protsedýra prezidentti qyzmetinen shettetýden (impichment jariialaý - red.) ońai bolmaýy tiis dep sanaidy" deidi Toktakýnov.
Konstitýtsiialyq palata zańger Toktakýnovtyń shaǵymyn biyl shildede óndiriske alǵan. Zańger eks-prezidentke tiisýge bolmaidy degen absaliýtti quqyq konstitýtsiianyń "zań aldynda adamdardyń barlyǵy teń" degen printsipine qaishy keledi deidi.
Qyrǵyzstan prezidentiniń qyzmetine kepildik berý týraly zańnyń 12-babynda eks-prezident Qyrǵyzstan prezidenti qyzmetin atqarý kezindegi áreketi nemese áreketsizdigi úshin qylmystyq jáne ákimshilik jaýapqa tartylmaidy, tutqyndalyp, qamalmaidy, tintilmeidi jáne tergelmeidi delingen. Qyrǵyzstanda eks-prezident mártebesine Roza Otýnbaeva men Almazbek Atambaev qana ie.
Zańnyń bul talabyn joiý týraly talqy Almazbek Atambaevtyń Bishkek TETs-in modernizatsiialaýǵa tikelei qatysy bary týraly málimdemeden keiin kúsheigen. Qyrǵyzstan quqyq qorǵaý organdar TETs-ti modernizatsiialaý kezinde sybailas jemqorlyq qylmysy bolǵan dep kúdiktenedi. Atambaev aiypty joqqa shyǵarady.
"Bishkek TETs-in modernizatsiialaý" jobasyn iske asyrý kezindegi yqtimal sybailas jemqorlyq faktisin tergeý aiasynda Almazbek Atambaevtyń úsh serigi - burynǵy premer-ministr Sapar Isakov, Bishkektiń eks-meri Kýbanychbek Kýlmatov pen depýtat Osmonbek Artykbaev qamaldy. Bul úsh saiasatker de Atambaev basqaratyn Sotsial-demokratiialyq partiianyń múshesi. Iskakov, Kýlmatov pen Artykbaev ózderine taǵylǵan aiypty teristeidi.
