Qyrǵyzstan densaýlyq saqtaý jáne áleýmettik damý ministri Alymkadyr Beishenaliev 16 sáýir kúngi baspasóz jiynynda jýrnalisterdiń kózinshe ýqorǵasyn tamyrynyń (Ystyqkól tamyry nemese akonit) tunbasyn ishti. Onyń aldynda ministr qazirgi prezident Sadyr Japarovtyń byltyr koronavirýs indeti bastalyp jatqan shaqta sol kezdegi basshy Sooronbai Jeenbekovke hat jazyp, Ystyqkól tamyrynyń shipaly qasieti jaily aitqanyn jetkizdi. Ministrdiń aitýynsha, Japarov atalǵan ósimdiktiń tamyry koronavirýsty da emdeitinin jazǵan.
Beishenalievtiń sózine qaraǵanda, qazirgi prezidentke tamyrdy qalai qoldaný kerektigin ákesi úiretken.
"Ol maǵan qaiyryldy. Ol kezde men ministr emes, qarapaiym dáriger bolatynmyn. Tunbany týystaryma berip, synap kórdim, olardyń jaǵdaiy táýirledi. Sosyn Sadyr Nurǵojaulyna (Japarov) qaiyrylyp, bizge koronavirýsty emdeýmen kúresýge kómektesýin suradym. Bizdiń jigitter sol tamyrdy izdep, jinap jatyr, osynda dári jasaimyz. Ystyqkól tamyryn qainatyp, tunbasyn patsientterge berdik. Koronavirýstyń jeńil túrine shaldyqqandar sony ishkennen keiin birden saýyǵyp ketti. Aýyr túrine shaldyqqandar tunbany birneshe kún iship júrdi. Ony ystyqtai ishý kerek" dedi ministr.
Ol osyndai ádispen shamamen 300 patsienttiń emdelip shyqqanyn jáne onyń dozasyn bir ǵana adam – prezident Sadyr Japarov biletinin aitty.
Budan soń ministr tikelei efirde sháinekten suiyqtyq quiyp ishti. Ministrdiń aitýynsha, ol Ystyqkól tamyrynyń tunbasyn qabyldaǵan.
Sarapshylar atalǵan ósimdiktiń óte ýly ekenin jáne ony tipti dene syrtyna da jaǵýǵa bolmaitynyn aitady.
Dúniejúzilik densaýlyq saqtaý uiymy Beishenalievtiń málimdemesine saqtyqpen qarap, Aconítum soongáricum (Ystyqkól tamyry nemese ýqorǵasyn) dárisiniń koronavirýs boiynsha tiimdiligi men qaýipsizdigi jóninde málimeti joǵyn aitty. DDSU klinikalyq synaqtan ótpegen preparattyń tirkelmeitinin jáne halyqqa paidalanýǵa usynylmaitynyn eskertti.
