© Sputnik / Tabyldy Kadyrbekov
Qyrǵyzstanda salyqtyq raqymshylyq jariialanyp, kólik quralyna salynatyn salyq joiyldy, dep habarlady qyrǵyzstandyq buqaraldyq aqparat quraldary.
Memleket basshysy Sadyr Japarov "Halyqtyń jáne kásipkerlik sýbektileriniń salyq júktemesin azaitý jáne salyq salýdy ákimshilendirýdi jetildirý jónindegi sharalar týraly" jarlyqqa qol qoidy. Osy qujatqa sáikes kólik quralyna salynatyn múlik salyǵy joiyldy.
Kólik salyǵy "Jol qory týraly" zańǵa engizilgen ózgeristerdiń nátijesinde joiyldy, esesine otynnyń ár litrinen bir som alym alynady.
Sondai-aq 2025 jylǵy 1 qańtarǵa deiin kólik salyǵyn tólemegen jáne olarǵa qatysty óndirip alý týraly sot aktisi joq azamattar kólik salyǵynan bosatylady.
"Biz sondai-aq zańdy jáne jeke kásipkerlerdiń 2022 jyldyń 1 qańtaryna deiin jinaqtalǵan barlyq qaryzyn keshirdik. Atalǵan kezeńdegi salyqtar tekserilmeidi", - dedi Qyrǵyzstan basshysy áleýmettik jelide.
Sonymen qatar prezident fermerlerdi jer salyǵynan bosatý moratoriiin 2030 jylǵa deiin uzartty.
"Osy merzimge deiin biz jerdi sýarý máselesin sheshemiz, negizgi jáne qosalqy sýarý arnalaryn salamyz, barlaryn tolyǵymen tazalaimyz jáne qajet bolǵan jaǵdaida jańasyn salamyz. Jalpy, memleket fermerler úshin sý máselesin sheshedi. Osydan keiin biz qaitadan salyq jinai bastaimyz", - dedi Japarov.
2025 jylǵy 1 qańtardan bastap Qyrǵyzstanda janar-jaǵarmai materialdarynyń árbir litrinen joldardy jóndeý jáne olarǵa qyzmet kórsetý úshin 1 som alym alynatyn bolady.
.jpg)
