Qyrǵyzstannyń ulttyq qaýipsizdik jónindegi memlekettik komitetiniń shekara qyzmeti 1 mamyr, jergilikti ýaqytpen 11:30-daǵy jaǵdai boiynsha qyrǵyz-tájik shekarasyndaǵy jaǵdai "salystyrmaly túrde shielenisip tur" dep habarlady.
Mekemeniń málimeti boiynsha, tájik jaǵy Tort-Kocho aýylyna baratyn joldy tolyq jaýyp tastaǵan. Tájikstan jerinde shekaraǵa qarai áskeri tehnika júrip jatqany baiqalady.
Tájik jaǵy bul aqparatqa qatysty áli kommentarii bermedi.
30 sáýir keshkisin Qyrǵyzstannyń Batken oblystyq ákimshiligi Osh-Batken-Isfana trassasynda Tort-Kocho tusyndaǵy avtojol qaita ashylǵanyn habarlaǵan. Buǵan qosa, Tájikstandy Qyrǵystan jeriniń ortasyndaǵy Vorýh anklavymen jalǵap jatqan Isfara-Vorýh joly da ashylǵan.
1 mamyrda tańǵy 9-da Qyrǵyzstan shekara qyzmeti shekaradaǵy ahýaldy "turaqty" dep baǵalaǵan. Mekemeniń habarlaýynsha, ótken túni shekarada eshqandai qaqtyǵys ta, atys ta bolmaǵan.
28-29 sáýirde Qyrǵyzstan men Tájikstan shekarasynda qarýly qaqtyǵys boldy, sonyń kesirinen kemi 31 adam qaza taýyp, 154 kisi jaraqat alǵan. Ondaǵan aýyl zardap shekti, turǵyn úiler men basqa da dúnie-múlik órtendi, 30 myńǵa tarta adam evakýatsiialandy.
Tájikstan biligi qaza tapqandar men jaralanǵandar týraly málimet jariialaǵan joq. Azattyqtyń Tájik qyzmetiniń deregi boiynsha, oqiǵa kezinde bul eldiń 12 azamaty opat bolǵan, olardyń 4-ýi áskeri qyzmetker.
Qaqtyǵys 28 sáýir keshke bastalǵan. Tájikstannyń bir top azamaty Kók-Tash mańynda, shekarada ornalasqan "Golovnoi" sý taratý ortalyǵyna baqylaý kamerasyn ornatpaq bolǵan. Bul jaǵdai tóbeleske, odan ári tas laqtyrýǵa ulasqan. Janjalǵa Kók-Tash pen Hodja Alo aýylynyń turǵyndary qosyldy. Eki el shekarasynda qaqtyǵysqan eki top 29 sáýir keshkisin kelisimge kelip, 24 saǵatqa sozylǵan janjalǵa núkte qoidy.
Qyrǵyzstan prezidenti Sadyr Japarov osy oqiǵa kesirinen qaza tapqandar qurmetine 1-2 mamyrdy qaraly kún dep jariialady.
Bul kúnderi el aýmaǵyndaǵy jáne shetelderdegi diplomatiialyq jáne konsýldyq mekemelerde Qyrǵyzstannyń memlekettik týy tómen túsiriledi. Buǵan qosa mádeniet oryndary men teleradiokompaniialar oiyn-saýyq sharalary men habarlaryn toqtata turýy tiis.
