Qyrǵyz-tájik shekarasy mańyndaǵy sý bógetinde qaraýylda turǵan qyrǵyz sarbazy
14 maýsymda Qyrǵyzstannyń Batken oblysyndaǵy Tájikstanmen shekarada eki eldiń shekarashylary qarýdan oq atqan. Bul týraly Qyrǵyzstan ulttyq qaýipsizdik jónindegi memlekettik komiteti (UQMK) habarlady, dep jazady Azattyq.
UQMK aqparatynda tańerteńgi 6:50-7:00 shamasynda Tájikstannyń "Keh" shekara beketi jaǵynan Qyrǵyzstannyń "Bulaq-Bashy" shekara beketine oq atylyp, oǵan jaýap retinde qyrǵyz tarapynan da tájik shekara beketine oq atylǵany aitylǵan.
"Eki jaqtyń shekarashylary birden áskeri pozitsiiaǵa ornalasqan. Qyrǵyz respýblikasynyń Batken oblysy boiynsha shekara ókili men Tájikstan respýblikasynyń Soǵdy oblysy boiynsha shekara ókili telefonmen kelissóz ótkizdi. Oqiǵa bolǵan jerge eki jaqtyń shekara tobynyń basshylary barǵan. Biraq saǵat 7:50 kezinde tájik taraby granatomet pen minomet qoldanyp, taǵy atys bastaǵan" dep habarlady Qyrǵyzstan shekara qyzmeti.
Aqparatqa qaraǵanda, tańerteńgi saǵat 8:10 kezinde atys toqtaǵan, biraq UQMK shekara qyzmeti jaǵdai shielenisip turǵanyn aitady. Qazir eki eldiń shekara qyzmetiniń ókilderi kezdesip, atystyń sebebin anyqtap, jaǵdaidy odan ary ýshyqtyrmaýǵa tyrysyp jatyr dep habarlady qyrǵyz jaǵy.
Tájistan taraby bolǵan oqiǵa jaily ázirge eshqandai aqparat taratpady.
Tájikstan men Qyrǵyzstan arasyndaǵy 970 kilometr shekaranyń 519 shaqyrymy kelisilgen, qalǵan bóligi áli naqtylanǵan joq. Qyrǵyzdyń Batken oblysy men Tájikstannyń Soǵdy oblysy arasyndaǵy daýly jerde aýyldar, kei tusynda eki eldiń turǵyndarynyń úileri qońsy ornalasqandyqtan ol jerde shekarany naqtylap, belgileý qiyndyq týǵyzǵan.
Sonyń saldarynan kórshi eki eldiń turǵyndary men shekarashylary arasynda sýǵa, jerge talas jii bolyp turady. Keide janjal barysynda qarý qoldanylyp, adam ólimine ulasady.
Aita keteiik, 3 maýsymda da tájiktiń Vorýh anklavymen shektesetin Bulaq-Bashyda birneshe saǵat atys bolyp, qyrǵyzstandyq eki shekarashy jaralanǵan.
Biyl sáýir aiynda qyrǵyz-tájik shekarasynda taǵy bir atys bolyp, bir tájik shekarashysy oqqa ushty.
