قىرعىز-تەجٸك شەكاراسى ماڭىنداعى سۋ بٶگەتٸندە قاراۋىلدا تۇرعان قىرعىز ساربازى
14 ماۋسىمدا قىرعىزستاننىڭ باتكەن وبلىسىنداعى تەجٸكستانمەن شەكارادا ەكٸ ەلدٸڭ شەكاراشىلارى قارۋدان وق اتقان. بۇل تۋرالى قىرعىزستان ۇلتتىق قاۋٸپسٸزدٸك جٶنٸندەگٸ مەملەكەتتٸك كوميتەتٸ (ۇقمك) حابارلادى, دەپ جازادى ازاتتىق.
ۇقمك اقپاراتىندا تاڭەرتەڭگٸ 6:50-7:00 شاماسىندا تەجٸكستاننىڭ "كەح" شەكارا بەكەتٸ جاعىنان قىرعىزستاننىڭ "بۇلاق-باشى" شەكارا بەكەتٸنە وق اتىلىپ, وعان جاۋاپ رەتٸندە قىرعىز تاراپىنان دا تەجٸك شەكارا بەكەتٸنە وق اتىلعانى ايتىلعان.
"ەكٸ جاقتىڭ شەكاراشىلارى بٸردەن ەسكەري پوزيتسيياعا ورنالاسقان. قىرعىز رەسپۋبليكاسىنىڭ باتكەن وبلىسى بويىنشا شەكارا ٶكٸلٸ مەن تەجٸكستان رەسپۋبليكاسىنىڭ سوعدى وبلىسى بويىنشا شەكارا ٶكٸلٸ تەلەفونمەن كەلٸسسٶز ٶتكٸزدٸ. وقيعا بولعان جەرگە ەكٸ جاقتىڭ شەكارا توبىنىڭ باسشىلارى بارعان. بٸراق ساعات 7:50 كەزٸندە تەجٸك تارابى گراناتومەت پەن مينومەت قولدانىپ, تاعى اتىس باستاعان" دەپ حابارلادى قىرعىزستان شەكارا قىزمەتٸ.
اقپاراتقا قاراعاندا, تاڭەرتەڭگٸ ساعات 8:10 كەزٸندە اتىس توقتاعان, بٸراق ۇقمك شەكارا قىزمەتٸ جاعداي شيەلەنٸسٸپ تۇرعانىن ايتادى. قازٸر ەكٸ ەلدٸڭ شەكارا قىزمەتٸنٸڭ ٶكٸلدەرٸ كەزدەسٸپ, اتىستىڭ سەبەبٸن انىقتاپ, جاعدايدى ودان ارى ۋشىقتىرماۋعا تىرىسىپ جاتىر دەپ حابارلادى قىرعىز جاعى.
تەجٸستان تارابى بولعان وقيعا جايلى ەزٸرگە ەشقانداي اقپارات تاراتپادى.
تەجٸكستان مەن قىرعىزستان اراسىنداعى 970 كيلومەتر شەكارانىڭ 519 شاقىرىمى كەلٸسٸلگەن, قالعان بٶلٸگٸ ەلٸ ناقتىلانعان جوق. قىرعىزدىڭ باتكەن وبلىسى مەن تەجٸكستاننىڭ سوعدى وبلىسى اراسىنداعى داۋلى جەردە اۋىلدار, كەي تۇسىندا ەكٸ ەلدٸڭ تۇرعىندارىنىڭ ٷيلەرٸ قوڭسى ورنالاسقاندىقتان ول جەردە شەكارانى ناقتىلاپ, بەلگٸلەۋ قيىندىق تۋعىزعان.
سونىڭ سالدارىنان كٶرشٸ ەكٸ ەلدٸڭ تۇرعىندارى مەن شەكاراشىلارى اراسىندا سۋعا, جەرگە تالاس جيٸ بولىپ تۇرادى. كەيدە جانجال بارىسىندا قارۋ قولدانىلىپ, ادام ٶلٸمٸنە ۇلاسادى.
ايتا كەتەيٸك, 3 ماۋسىمدا دا تەجٸكتٸڭ ۆورۋح انكلاۆىمەن شەكتەسەتٸن بۇلاق-باشىدا بٸرنەشە ساعات اتىس بولىپ, قىرعىزستاندىق ەكٸ شەكاراشى جارالانعان.
بيىل سەۋٸر ايىندا قىرعىز-تەجٸك شەكاراسىندا تاعى بٸر اتىس بولىپ, بٸر تەجٸك شەكاراشىسى وققا ۇشتى.
