Qyrǵyz-tájik shekarasyna jaqyn aýyl. Kórneki sýret.
10 naýryzda Qyrǵyzstannyń Batken oblysynyń qyrǵyz-tájik shekarasy mańynda atys boldy. Bul týraly Qyrǵyzstannyń Ulttyq qaýipsizdik jónindegi memlekettik komiteti habarlady, dep jazady Azattyq.
Resmi málimetke qaraǵanda, saǵat 10:50-de shekaradaǵy mártebesi anyqtalmaǵan Teskei dep atalatyn jerde Tájikstannyń shekara otriady "buǵan deiin belgilengen qozǵalys baǵytyn buzyp, shekara kúzetiniń jańa mejesine ótip, sol jerdegi qyrǵyz shekarashylarynan ketýin talap etken".
Qyrǵyzstan shekara qyzmetiniń málimetinshe, tájik shekarashylaryna qosymsha kúsh kelgen sol olar jańa mejege ótýge talpyndy.
"Alaida qyrǵyz shekarashylary Tájikstan jaýyngerlerine jol bermedi. Atys shamamen 10 minýtqa sozyldy. Atystan qyrǵyz jaǵynan eshkim zardap shekpedi" dep habarlady UQMK Shekara qyzmeti.
Azattyq radiosy Tájik qyzmetiniń Isfaradaǵy derekkóziniń habarlaýynsha, atystan jaralanǵandar bar. Isfara aýrýhanasyndaǵy dárigerlerler de bul aqparatty rastady, biraq Tájikstannyń resmi biligi ázirge málimet taratqan joq.
Chorký aýyly turǵyndary men Isfara qalasy ákimdigindegi derekkózderdiń aitýynsha, oqiǵa №4 qus sharýashylyǵy kooperativiniń mańynda bolǵan.
"Oqiǵa tájik shekarashylary aýysqan ýaqytta boldy. Jańalary kelgen ýaqytta qyrǵyz shekarashylary bizdikilerdi balaǵattap, odan soń eskertýsiz oq ata bastady. Shekarashylarymyzdyń biri sol jerde opat boldy, taǵy bir sharýa jaralandy" deidi derekkóz.
Isfara turǵyndarynyń aitýynsha, jol ashyq bolǵanymen Hojai Aalo men Vorýhqa qarai eshkim júrip jatqan joq. Qyrǵyz áskeri joǵary deńgeidegi daiyndyqpen tur.
Málimetterge qaraǵanda, shekaradaǵy oqiǵadan soń eki eldiń shekarashylary telefonmen sóilesip, shekara kúzetin oqiǵa bolǵan jerden alyp ketýge kelisti. Saǵat 11:45-te Qyrǵyzstan men Tájikstan shekarashylary kelissóz júrgize bastady.
Qyrǵyz-tájik shekarasy 970 shaqyrymǵa sozylyp jatyr, sonyń 519 shaqyrymynyń ǵana mártebesi anyqtalǵan. Shekaranyń bekitilmegen jerinde jer, sý úshin jii janjal bolyp turady.
