Qyrǵyzstan men Tájikstan shekarasynda taǵy da qaqtyǵys boldy, dep habarlaidy "Ult aqparat" eki eldiń aqparat kózderine silteme jasap.
Qyrǵyzstandyq Kabar agenttiginiń málimetine sensek, 8 shilde kúni 17.00 kezinde memlekettik shekarada Qyrǵyzstan men Tájikstan shekara qyzmetiniń áskerileri arasynda atys bolǵan.
«Qyrǵyz shekara jasaǵy Batken oblysy Láilek aýdany Naýmina asýyndaǵy memlekettik shekarada qyzmetin atqaryp júrgen. Tiisti baǵytpen kele jatqanda, Chashmagildan asýynda olarǵa aiaq astynan tájik shekarashylary shabýyl jasaǵan. Eki eldiń áskerileri arasynda atys bolǵan» delingen QR shekara qyzmeti taratqan habarlamada.
Oqiǵadan zardap shekkender týraly aqparat naqtylanyp jatyr.
Jaǵdaidyń jai-japsaryn anyqtaý úshin oqiǵa ornyna QR memlekettik ulttyq qaýipsizdik komiteti shekara qyzmetiniń Batken oblysy boiynsha basqarma bastyǵy, polkovnik Kyialbek Tolonbaev, kúsh qurylymdarynyń basshylary attanǵan.
Eki eldiń shekara qyzmetiniń ókilderi atalǵan fakti boiynsha tekserý júrgizip jatyr.
Búgin sondai-aq tájikstandyq Hovar agenttigi eldiń shekara qyzmetiniń osy jaǵdaiǵa qatysty taratqan habarlamasyn jariialady.
Oǵan sensek, 8 shilde kúni jergilikti ýaqytpen saǵat 14.55 kezinde 4 qyrǵyz shekarashysy Soǵdy oblysy Devashtich aýdany Rosrovýt degen jerde tájik shekarasyn zańsyz kesip ótken.
Olar áskeri jáne kádimgi kiim kigen. Qoldarynda Kalashnikov avtomaty bolǵan. Olar Devashtich aýdany turǵyndaryna tiesili 9 jylqyny Qyrǵyzstan aýmaǵyna alyp ketý úshin kelgen.
Olar tájik shekarashylarynyń memlekettik shekarany kesip ótpeý týraly eskertpesine qulaq aspai, avtomattan oq jaýdyrǵan. Buǵan tájik shekarashylary da oq atyp, jaýap bergen. Odan shekarany zańsyz kesip ótkenderdiń ekeýi jaraqat aldy.
«Qazirgi tańda qos memlekettiń quzyrly organ ókilderi oqiǵa ornyna kelip, qaqtyǵystyń mán-jaiyn anyqtap jatyr» dep jazady Hovar.
