Qyrǵyzstan parlamenti "internettegi jalǵan aqparatqa tosqaýyl qoiady" dep dáriptelgen daýly zańdy maquldady. Quqyq qorǵaýshylar men oppozitsiia ókilderi "Jalǵan jáne anyq emes aqparattan qorǵaý jónindegi" jańa zań sóz bostandyǵyn shekteidi dep alańdaidy. Bul jóninde Azattyqtyń Qyrǵyz qyzmeti habarlady.
Zań jobasyn qyrǵyz parlamenti – jogorký keńeshtiń 97 depýtaty qoldasa, tek bes depýtat qarsy daýys bergen.
Qyrǵyzstannyń adam quqyqtary jáne media uiymdary el konstitýtsiiasyna, onyń halyqaralyq mindettemelerine qaishy keledi jáne adam quqyqtary men sóz bostandyǵyn shekteidi dep zań jobasyn ótkir synǵa aldy.
Zańdaǵy erejelerge sáikes, úkimet quratyn jańa uiym onlain posttardyń mazmunyna bailanysty aryz-shaǵymdarǵa 48 saǵat ishinde jaýap berýi tiis. Kontentti jariialaǵan sait qadaǵalaýshy uiymnyń kez kelgen talabyn 24 saǵat ishinde oryndaýǵa mindetti.
Jańa zań boiynsha, internet provaiderleri klientterin ortaq identifikatsiia júiesine tirkeýge alyp, suraý salǵan sot nemese memlekettik organǵa qoldanýshy týraly tolyq málimetti berýi tiis.
Sonymen birge, zań boiynsha vebsait pen áleýmettik jeli akkaýnttarynyń ieleri jeke málimeti men elektrondy mekemenjaiyn jurttyń bári kóretindei etip ashyq jariialaýǵa mindetti, al anonim internet qoldanýshylar anyqtalyp, internetten ajyratylyp otyrady.
Basynda "Aqparatty manipýliatsiialaý týraly" dep atalǵan zań jobasyn jogorký keńesh depýtattary Gúlshat Asylbaeva men Ainur Osmonova osydan bir jyl buryn usynǵan.
Joba 2020 jylǵy maýsymda Bishkek turǵyndarynyń jappai qarsylyǵyn týǵyzyp, sol kezdegi prezident Sooronbai Jeenbekov ony qaita talqylaý úshin depýtattarǵa keri qaitarǵan.
Daýly parlament sailaýy budan da kóp jurttyń narazylyǵyna ulasyp, qazan aiynda úkimet te, prezident Jeenbekov te otstavkaǵa ketti.
Biyl qańtarda prezident bolyp sailanǵan Sadyr Japarov elde "tártip ornatyp", atqarýshy bilik tarmaǵyn nyǵaitý maqsatynda kóp zańdy ózgertýdi usyndy.
11 sáýirde bolǵan referendýmda sailaýshylardyń 80 paiyzdaiy prezidenttiń ókiletin keńeitetin jańa konstitýtsiia jobasyn qoldap daýys berdi.
