قىرعىزستان پارلامەنتٸ "ينتەرنەتتەگٸ جالعان اقپاراتقا توسقاۋىل قويادى" دەپ دەرٸپتەلگەن داۋلى زاڭدى ماقۇلدادى. قۇقىق قورعاۋشىلار مەن وپپوزيتسييا ٶكٸلدەرٸ "جالعان جەنە انىق ەمەس اقپاراتتان قورعاۋ جٶنٸندەگٸ" جاڭا زاڭ سٶز بوستاندىعىن شەكتەيدٸ دەپ الاڭدايدى. بۇل جٶنٸندە ازاتتىقتىڭ قىرعىز قىزمەتٸ حابارلادى.
زاڭ جوباسىن قىرعىز پارلامەنتٸ – جوگوركۋ كەڭەشتٸڭ 97 دەپۋتاتى قولداسا, تەك بەس دەپۋتات قارسى داۋىس بەرگەن.
قىرعىزستاننىڭ ادام قۇقىقتارى جەنە مەديا ۇيىمدارى ەل كونستيتۋتسيياسىنا, ونىڭ حالىقارالىق مٸندەتتەمەلەرٸنە قايشى كەلەدٸ جەنە ادام قۇقىقتارى مەن سٶز بوستاندىعىن شەكتەيدٸ دەپ زاڭ جوباسىن ٶتكٸر سىنعا الدى.
زاڭداعى ەرەجەلەرگە سەيكەس, ٷكٸمەت قۇراتىن جاڭا ۇيىم ونلاين پوستتاردىڭ مازمۇنىنا بايلانىستى ارىز-شاعىمدارعا 48 ساعات ٸشٸندە جاۋاپ بەرۋٸ تيٸس. كونتەنتتٸ جارييالاعان سايت قاداعالاۋشى ۇيىمنىڭ كەز كەلگەن تالابىن 24 ساعات ٸشٸندە ورىنداۋعا مٸندەتتٸ.
جاڭا زاڭ بويىنشا, ينتەرنەت پروۆايدەرلەرٸ كليەنتتەرٸن ورتاق يدەنتيفيكاتسييا جٷيەسٸنە تٸركەۋگە الىپ, سۇراۋ سالعان سوت نەمەسە مەملەكەتتٸك ورگانعا قولدانۋشى تۋرالى تولىق مەلٸمەتتٸ بەرۋٸ تيٸس.
سونىمەن بٸرگە, زاڭ بويىنشا ۆەبسايت پەن ەلەۋمەتتٸك جەلٸ اككاۋنتتارىنىڭ يەلەرٸ جەكە مەلٸمەتٸ مەن ەلەكتروندى مەكەمەنجايىن جۇرتتىڭ بەرٸ كٶرەتٸندەي ەتٸپ اشىق جارييالاۋعا مٸندەتتٸ, ال انونيم ينتەرنەت قولدانۋشىلار انىقتالىپ, ينتەرنەتتەن اجىراتىلىپ وتىرادى.
باسىندا "اقپاراتتى مانيپۋلياتسييالاۋ تۋرالى" دەپ اتالعان زاڭ جوباسىن جوگوركۋ كەڭەش دەپۋتاتتارى گٷلشات اسىلباەۆا مەن اينۇر وسمونوۆا وسىدان بٸر جىل بۇرىن ۇسىنعان.
جوبا 2020 جىلعى ماۋسىمدا بٸشكەك تۇرعىندارىنىڭ جاپپاي قارسىلىعىن تۋعىزىپ, سول كەزدەگٸ پرەزيدەنت سوورونباي جەەنبەكوۆ ونى قايتا تالقىلاۋ ٷشٸن دەپۋتاتتارعا كەرٸ قايتارعان.
داۋلى پارلامەنت سايلاۋى بۇدان دا كٶپ جۇرتتىڭ نارازىلىعىنا ۇلاسىپ, قازان ايىندا ٷكٸمەت تە, پرەزيدەنت جەەنبەكوۆ تە وتستاۆكاعا كەتتٸ.
بيىل قاڭتاردا پرەزيدەنت بولىپ سايلانعان سادىر جاپاروۆ ەلدە "تەرتٸپ ورناتىپ", اتقارۋشى بيلٸك تارماعىن نىعايتۋ ماقساتىندا كٶپ زاڭدى ٶزگەرتۋدٸ ۇسىندى.
11 سەۋٸردە بولعان رەفەرەندۋمدا سايلاۋشىلاردىڭ 80 پايىزدايى پرەزيدەنتتٸڭ ٶكٸلەتٸن كەڭەيتەتٸن جاڭا كونستيتۋتسييا جوباسىن قولداپ داۋىس بەردٸ.
