Qyrǵyzstanda Batken oblysynyń biligi 13 mamyrda qyrǵyz-ózbek shekarasynda bolǵan janjalǵa túsinikteme berdi. Bul týraly Azattyqtyń Qyrǵyz qyzmeti habarlady. Aimaq basshylyǵy janjaldyń turmystyq daýdan týyndaǵanyn, jaǵdaidyń baqylaýda ekenin aitty.
Resmi aqparat boiynsha, Batken oblysy Sai aýylynyń turǵyndary men Ózbekstannyń Soh aýdany Chashma aýyly turǵyndary daýlasyp, sońy tóbeleske ulasqan. Artynsha eki jaqtan adamdar shekara aýmaǵyna jinalǵan.
Qazir oqiǵa ornynda eki eldiń biligi júr. Olar túsindirý jumystaryn júrgizip jatyr. Politsiia tergeý amaldaryn bastaǵan.
Osyǵan deiin Qyrǵyzstan men Ózbekstan shekarasynda qyrǵyz azamatynyń soqqyǵa jyǵylyp, shamamen 30-40 adamnyń shekaraǵa jinalǵany týraly aqparat taraǵan edi.
Ózbek jaǵy ázirge oqiǵaǵa túsinikteme bermedi.
Qyrǵyzstan men Ózbekstan shekarasynyń uzyndyǵy – 1378 shaqyrym. 2017 jylǵy kelissózden keiin shekaranyń 85 paiyzy kelisilgenin, 15 paiyzy daýly kúide qalǵany habarlanǵan. Eki táýelsiz el arasynda 30 jylǵa sozylǵan shekara daýy túrli janjal men tóbelesterge sebep bolyp júr.
Naýryz aiynyń sońynda Qyrǵyzstan taraby Ózbekstanmen shekara máselesi "júz paiyzǵa sheshildi" dep málimdegen. Ulttyq qaýipsizdik jónindegi memlekettik komitet basshysy, qyrǵyz-ózbek shekarasynda delimitatsiia men demarkatsiia júrgizý máseleleri jónindegi úkimet delegatsiiasynyń jetekshisi Kamchybek Tashiev eki el arasynda "daýly aýmaq qalǵan joq" dep málimdegen. Alaida keibir qyrǵyz azamattary sheshimge narazy bolyp, aktsiia uiymdastyrǵan.
