قىرعىزستاندا باتكەن وبلىسىنىڭ بيلٸگٸ 13 مامىردا قىرعىز-ٶزبەك شەكاراسىندا بولعان جانجالعا تٷسٸنٸكتەمە بەردٸ. بۇل تۋرالى ازاتتىقتىڭ قىرعىز قىزمەتٸ حابارلادى. ايماق باسشىلىعى جانجالدىڭ تۇرمىستىق داۋدان تۋىنداعانىن, جاعدايدىڭ باقىلاۋدا ەكەنٸن ايتتى.
رەسمي اقپارات بويىنشا, باتكەن وبلىسى ساي اۋىلىنىڭ تۇرعىندارى مەن ٶزبەكستاننىڭ سوح اۋدانى چاشما اۋىلى تۇرعىندارى داۋلاسىپ, سوڭى تٶبەلەسكە ۇلاسقان. ارتىنشا ەكٸ جاقتان ادامدار شەكارا اۋماعىنا جينالعان.
قازٸر وقيعا ورنىندا ەكٸ ەلدٸڭ بيلٸگٸ جٷر. ولار تٷسٸندٸرۋ جۇمىستارىن جٷرگٸزٸپ جاتىر. پوليتسييا تەرگەۋ امالدارىن باستاعان.
وسىعان دەيٸن قىرعىزستان مەن ٶزبەكستان شەكاراسىندا قىرعىز ازاماتىنىڭ سوققىعا جىعىلىپ, شامامەن 30-40 ادامنىڭ شەكاراعا جينالعانى تۋرالى اقپارات تاراعان ەدٸ.
ٶزبەك جاعى ەزٸرگە وقيعاعا تٷسٸنٸكتەمە بەرمەدٸ.
قىرعىزستان مەن ٶزبەكستان شەكاراسىنىڭ ۇزىندىعى – 1378 شاقىرىم. 2017 جىلعى كەلٸسسٶزدەن كەيٸن شەكارانىڭ 85 پايىزى كەلٸسٸلگەنٸن, 15 پايىزى داۋلى كٷيدە قالعانى حابارلانعان. ەكٸ تەۋەلسٸز ەل اراسىندا 30 جىلعا سوزىلعان شەكارا داۋى تٷرلٸ جانجال مەن تٶبەلەستەرگە سەبەپ بولىپ جٷر.
ناۋرىز ايىنىڭ سوڭىندا قىرعىزستان تارابى ٶزبەكستانمەن شەكارا مەسەلەسٸ "جٷز پايىزعا شەشٸلدٸ" دەپ مەلٸمدەگەن. ۇلتتىق قاۋٸپسٸزدٸك جٶنٸندەگٸ مەملەكەتتٸك كوميتەت باسشىسى, قىرعىز-ٶزبەك شەكاراسىندا دەليميتاتسييا مەن دەماركاتسييا جٷرگٸزۋ مەسەلەلەرٸ جٶنٸندەگٸ ٷكٸمەت دەلەگاتسيياسىنىڭ جەتەكشٸسٸ كامچىبەك تاشيەۆ ەكٸ ەل اراسىندا "داۋلى اۋماق قالعان جوق" دەپ مەلٸمدەگەن. الايدا كەيبٸر قىرعىز ازاماتتارى شەشٸمگە نارازى بولىپ, اكتسييا ۇيىمداستىرعان.
