Foto:WNG2024 telegram
5-shi Dúniejúzilik kóshpendiler oiyndary kezinde Qyrǵyzstan kókparshylarynyń jetekshisi Qazaqstannyń Ulttyq qaýipsizdik komiteti (UQK) tarapynan qujattaryn talap etip, olarǵa qysym kórsetilgenin málimdegen edi. Alaida Qazaqstannyń UQK bul aiyptaýlardy joqqa shyǵaryp, eshqandai zańsyz áreket jasalmaǵanyn habarlady, dep habarlaidy "Ult Aqparat".
"2024 jylǵy 12 qyrkúiekte BAQ-ta jáne áleýmettik jelilerde Qyrǵyzstan quramasynyń kókpar oiynshysyna UQK qyzmetkeri qysym kórsetkeni týraly aqparat taraldy. Bul aqparat shyndyqqa sáikes kelmeidi. UQK qyzmetkerleri 5-shi Dúniejúzilik kóshpendiler oiyndaryn ótkizý barysynda qoǵamdyq tártipti qamtamasyz etýge qatysqan joq. Tek resmi aqparat kózderine senýge shaqyramyz", -delingen habarlamada.
Aita keteiik, Qyrǵyz kókparshylarynyń jetekshisi Erlan Ábdiǵapparov Astanada ótip jatqan besinshi Dúniejúzilik kóshpendiler oiyndarynda jarystyń qorytyndysyna qatysty óz narazylyǵyn bildirdi. Onyń aitýynsha, oiyn barysynda ádiletsizdik bolǵan, ásirese Qazaqstan kókparshylarynyń paidasyna sheshimder qabyldanǵan. Ábdiǵapparov oiyn kezinde qyrǵyz komandasyna qysym jasalǵanyn, tóreshilerdiń sheshimderi men Qazaqstan komandasynyń áreketteri ádiletsiz bolǵanyn alǵa tartqan.
Ábdiǵapparovtyń sózinshe, Qyrǵyzstan komandasy jarys kezinde 3:1 esebimen alda bolǵan, alaida tóreshilerdiń sheshimderimen Qazaqstan kókparshylaryna tórt salym saldyrylǵan. Sondai-aq, ol oiyn barysynda tóreshiler ysqyryp, qarsylastardyń artyqshylyqtaryna múmkindik bergenin málimdegen.
