Foto:depositphotos.com
QMA azamattardy jeke bank kartalaryn paidalaný arqyly qylmystyq tabysty zańdastyrý úshin ońai tabys usynyp, qylmystyq shemalarǵa tartý derekteri jiilep ketkeni týraly eskertedi. Azamattar qarjylyq operatsiialar jasaý úshin bank kartalaryn úshinshi tulǵalarǵa berip, "drop" bolý qaýipin eskermei, qylmystyq shemalarǵa tartylýy múmkin, - dep habarlaidy «Ult aqparat» Tengrinews.kz-ke silteme jasap.
Aqsha kiber quqyqbuzýshylyqtardan nemese esirtki jáne adam satý siiaqty qylmystyq shemalardan tartylýy yqtimal. QMA júrgizgen taldaýyna sáikes, esirtki satýmen bailanysty shemalarda jalpy ainalymy 22 milliard teńge bolatyn 30 myń bank kartasy paidalanylǵan.
Mundai zańsyz shemalarǵa qatysý tulǵalardyń múlkin tárkileý, ákimshilik jáne qylmystyq jaýapkershilik siiaqty aýyr saldarǵa ákeledi.
"QMA sońǵy zertteýlerine sáikes, qarjylyq qiyndyqtarǵa tap bolǵandardyń, atap aitqanda jumyssyzdar, stýdentter jáne áleýmettik osal top ókilderiniń alaiaqtardyń jeńil jolmen ońai oljaǵa kenelý ýádelerine senip, "drop" bolyp qalý qaýipi joǵary ekeni anyqtaldy", - delingen habarlamada.
Astana men Qaraǵandy stýdentteri jáne Temirtaýlyq 64 jastaǵy zeinetker "drop" retinde Telegram-dúkeninde esirtki satýdan alynǵan aqshany jylystatý shemasyna qatysqan. Olardyń shottary arqyly 100 million teńgeden asa qarjy ótken. Bul narkoshoptyń jalpy ainalymy 2 milliard teńgeden asqan.
Taǵy bir jaǵdaida Almatyda 20 jastaǵy stýdenttiń kartasy paidalanylyp, onyń shotyna 900-den astam adamnan 22,5 million teńge túsken. Aýdarymdar 7.5 myńnan 15 myń teńgege deiingi aralyqta bolǵan, bul somalar esirtki zattarynyń bir rettik dozalarynyń qunyna sáikes keledi. Keiinnen bul aqsha quqyq buzýshylardyń kripto-ámiiandaryna shyǵarylǵany aityldy.
"Qurmetti azamattar! Onlain dialog arqyly beitanys azamattar nemese kompaniianyń ókilderi habarlasyp, shotyńyzǵa syiaqyǵa aqsha aýdaryp, esesinen ońai aqsha tabýdy usynǵan jaǵdaida qyraǵylyq tanytyp, ózińizdi qylmystyq shemanyń múshesi bolýdan saqtańyz. Eger siz mundai usynystarǵa tap bolsańyz, alaiaqtarmen barlyq bailanysty toqtatyp, aqsha aýdarmańyz", - delingen úndeýde.
