Tóreǵali Tóreáli toi ústinde ustalǵan Qairat Nurtasqa qoldaý bildirdi. Sondai-aq, ánshi ákimdik pen quqyq qorǵaý qyzmetkerlerin toidy bizneske ainaldyryp aldy dep aiyptady. Bul týraly ol óziniń Instagram paraqshasynda jazdy.
Kúni keshe ǵana BAQ betterinde ánshi Qairat Nurtastyń karantin talaptaryn saqtamai, toi toilap júrgen jerinen mobildi toptyń «quryǵyna túskeni» týraly aqparat tarady. Osy oqiǵaǵa qatysty óner iesi Tóreǵali Tóreáli áleýmettik jelide óz oiyn jazdy.
«Sońǵy eki-úsh kúnde Qairat Nurtas toi ústinde ustaldy dep, týra qylmys ústinde qandyqol qaraqshy ustaǵandai urandatyp júrgender bar. Shyn óner adamy shaqyrsa, qandai ortaǵa bolsyn baryp, óner kórsetýdi paryz sanaidy. Roza apalarymyz oq jaýyp turǵan soǵysta tanktiń ústinde án aitqan ǵoi. Týberkýlez jailaǵan túrmeden bastap, jemqorlyq jailaǵan minbege deiin qurmettep shaqyrsa barasyń... Onyń janynda basshylyqtan bastap, búkil júie durys kúrespei otyrǵan kovidten Qairat qana saqtanýǵa mindetti emes shyǵar?» - dep jazdy ánshi.
Avtor halyq arasynda jasyryn toi jasap júrgenderdi de tilge tiek etken. Onyń aitýynsha, toi ótkizýdi qalaityndar qalai da bolsa bir amalyn tabady.
«Virýstan emes, bilikten tyǵylyp, jaltaqtap jasyryn toilap halyq júr. Halyqty bul úshin jazǵyrýǵa bolmaidy. Mahabbat karantinge qaramaidy! Otaý qurǵan jastardyń nietin qoldap, jurtty jiyp, nekeni kópshilikke jariialaý dinniń de, dástúrdiń de mindeti. Ata-ana ol mindetti oryndaý úshin qandai jaǵdaida da jol tabatyny belgili. Qazirgi taýda, tabiǵat aiasynda, toihanalarda "jasyryn" ótip jatqan toilar sonyń dáleli», - delingen.
Sondai-aq, ánshi tyǵylyp toi ótkizýdi jemqor júieniń oiyny dep aiyptady. Aitýynsha, karantin tekseris tobynyń ókilderine maidai jaǵyp jatyr.
«Bári belgili, ári soǵan jol berip qoiyp, bilmegen keiip tanytqan jemqor júieniń oiyny bul. Sorlaityn sol qara halyq. Kovidti syltaýratyp ákimshilik pen áchastkovyi toidy óz biznesterine ainaldyryp aldy. Restoran qojaiyndary beretinin berip, "kryshasy" tabylǵanda ǵana "jasyryn" jumysyn bastaidy. Solai garantiiamen toiyn qabyldaǵanyn klientterden estip júrmiz. Ári toi ústinde tekserip kelgende qonaqtardy taratpai, "ózara kelisip" jalǵasyn tapqan toilardy da kózimiz kórdi», - dep jazdy avtor.
