تٶرەعالي تٶرەەلٸ توي ٷستٸندە ۇستالعان قايرات نۇرتاسقا قولداۋ بٸلدٸردٸ. سونداي-اق, ەنشٸ ەكٸمدٸك پەن قۇقىق قورعاۋ قىزمەتكەرلەرٸن تويدى بيزنەسكە اينالدىرىپ الدى دەپ ايىپتادى. بۇل تۋرالى ول ٶزٸنٸڭ ينستاگرام پاراقشاسىندا جازدى.
كٷنٸ كەشە عانا باق بەتتەرٸندە ەنشٸ قايرات نۇرتاستىڭ كارانتين تالاپتارىن ساقتاماي, توي تويلاپ جٷرگەن جەرٸنەن موبيلدٸ توپتىڭ «قۇرىعىنا تٷسكەنٸ» تۋرالى اقپارات تارادى. وسى وقيعاعا قاتىستى ٶنەر يەسٸ تٶرەعالي تٶرەەلٸ ەلەۋمەتتٸك جەلٸدە ٶز ويىن جازدى.
«سوڭعى ەكٸ-ٷش كٷندە قايرات نۇرتاس توي ٷستٸندە ۇستالدى دەپ, تۋرا قىلمىس ٷستٸندە قاندىقول قاراقشى ۇستاعانداي ۇرانداتىپ جٷرگەندەر بار. شىن ٶنەر ادامى شاقىرسا, قانداي ورتاعا بولسىن بارىپ, ٶنەر كٶرسەتۋدٸ پارىز سانايدى. روزا اپالارىمىز وق جاۋىپ تۇرعان سوعىستا تانكتٸڭ ٷستٸندە ەن ايتقان عوي. تۋبەركۋلەز جايلاعان تٷرمەدەن باستاپ, جەمقورلىق جايلاعان مٸنبەگە دەيٸن قۇرمەتتەپ شاقىرسا باراسىڭ... ونىڭ جانىندا باسشىلىقتان باستاپ, بٷكٸل جٷيە دۇرىس كٷرەسپەي وتىرعان كوۆيدتەن قايرات قانا ساقتانۋعا مٸندەتتٸ ەمەس شىعار?» - دەپ جازدى ەنشٸ.
اۆتور حالىق اراسىندا جاسىرىن توي جاساپ جٷرگەندەردٸ دە تٸلگە تيەك ەتكەن. ونىڭ ايتۋىنشا, توي ٶتكٸزۋدٸ قالايتىندار قالاي دا بولسا بٸر امالىن تابادى.
«ۆيرۋستان ەمەس, بيلٸكتەن تىعىلىپ, جالتاقتاپ جاسىرىن تويلاپ حالىق جٷر. حالىقتى بۇل ٷشٸن جازعىرۋعا بولمايدى. ماحاببات كارانتينگە قارامايدى! وتاۋ قۇرعان جاستاردىڭ نيەتٸن قولداپ, جۇرتتى جيىپ, نەكەنٸ كٶپشٸلٸككە جارييالاۋ دٸننٸڭ دە, دەستٷردٸڭ دە مٸندەتٸ. اتا-انا ول مٸندەتتٸ ورىنداۋ ٷشٸن قانداي جاعدايدا دا جول تاباتىنى بەلگٸلٸ. قازٸرگٸ تاۋدا, تابيعات اياسىندا, تويحانالاردا "جاسىرىن" ٶتٸپ جاتقان تويلار سونىڭ دەلەلٸ», - دەلٸنگەن.
سونداي-اق, ەنشٸ تىعىلىپ توي ٶتكٸزۋدٸ جەمقور جٷيەنٸڭ ويىنى دەپ ايىپتادى. ايتۋىنشا, كارانتين تەكسەرٸس توبىنىڭ ٶكٸلدەرٸنە مايداي جاعىپ جاتىر.
«بەرٸ بەلگٸلٸ, ەرٸ سوعان جول بەرٸپ قويىپ, بٸلمەگەن كەيٸپ تانىتقان جەمقور جٷيەنٸڭ ويىنى بۇل. سورلايتىن سول قارا حالىق. كوۆيدتٸ سىلتاۋراتىپ ەكٸمشٸلٸك پەن ەچاستكوۆىي تويدى ٶز بيزنەستەرٸنە اينالدىرىپ الدى. رەستوران قوجايىندارى بەرەتٸنٸن بەرٸپ, "كرىشاسى" تابىلعاندا عانا "جاسىرىن" جۇمىسىن باستايدى. سولاي گارانتييامەن تويىن قابىلداعانىن كليەنتتەردەن ەستٸپ جٷرمٸز. ەرٸ توي ٷستٸندە تەكسەرٸپ كەلگەندە قوناقتاردى تاراتپاي, "ٶزارا كەلٸسٸپ" جالعاسىن تاپقان تويلاردى دا كٶزٸمٸز كٶردٸ», - دەپ جازدى اۆتور.
