Qylmys áleminde «Serik-golova» laqap atymen tanymal Serik Jamanaev 19 jylǵa sottaldy, dep habarlaidy "Ult aqparat".
Sot úkimine sáikes, Serik Jamanaev kináli dep tanylyp, 1,75 million teńgesi, 6 myń dollary jáne qymbat avtokóligi tárkilenip, 19 jylǵa bas bostandyǵynan aiyryldy. «Serik-golova» qylmystyq-atqarý júiesiniń tótenshe qaýipsizdik mekemesinde 14 jyl otyrady. Sodan keiin jazasyn 5 jyl tolyq qaýipsizdik mekemesinde óteidi.
Aita keteiik, memlekettik aiyptaýshy Serik Jamanaevty 262-baptyń 2-bóligi «uiymdasqan top, qylmystyq uiym qurý jáne oǵan basshylyq etý, sol siiaqty olarǵa qatysý», 194-baptyń 4-bóliginiń 1-tarmaǵy «adamdar toby asa iri mólsherde kúsh qoldanyp jasaǵan qorqytyp alýshylyq», 106-baptyń 3-bóligi «abaisyzda adam ólimine ákep soqqan densaýlyqqa qasaqana aýyr ziian keltirý» boiynsha kináli dep tanýdy suraǵan edi.
Jamanaev 1996 jyly Reseidiń Sochi qalasynda «vor v zakone» degen mártebe alǵan. Ol ótken jyldyń aqpanynda UQK men IIM-niń birlesip júrgizgen operatsiiasy kezinde qolǵa tústi.
