QR Energetika ministri Nurlan Noǵaev energetika salasyna koronavirýstyń saldary qalai áser etkenin aitty, dep habarlaidy QazAqparat.
«Árine, óz sózimde koronavirýstyń aldyn alý máselesin de aityp ótpei bolmaidy. Bizdiń sala pandemiiadan zardap shekti, bul munai baǵasyna da áser etip, OPEK+ kelisimi aiasynda munai óndirisin shekteýge, ýran óndirisin tómendetýge jáne taǵy basqa saldarǵa ákep soqty. Qazirgi daǵdarys jáne ǵalamdyq syn-tegeýrinder jaǵdaiynda Memleket basshysy «Jańa jaǵdaidaǵy Qazaqstan: is-qimyl kezeńi» atty Joldaýynda elimizdi daǵdarystan keiingi kezeńnen shyǵarýdyń negizgi mindetterin atap ótti. Osy oraida Energetika ministrligi Memleket basshysynyń Joldaýynda berilgen tapsyrmalaryn oryndaý boiynsha aýqymdy jumys atqarýda», - dedi ministr vedomstvonyń keńeitilgen alǵa májilisinde.
Onyń aitýynsha, koronavirýstyq infektsiianyń taralýyna bailanysty ótken jyldyń aqpan aiynan bastap Ministrlikte múddeli kompaniialardyń qatysýymen qurylǵan COVID-19 jaǵdaiyn baqylaý jónindegi jedel shtab jumys isteidi. Jobalardaǵy jaǵdai týraly jedel aqparat kún saiyn shtabqa tapsyrylady.
«Qazirgi ýaqytta barlyq kompaniialar koronavirýstyq infektsiia taralýynyń aldyn alý jáne epidemiologiialyq ahýal nasharlaǵan jaǵdaida daiyndyqty qamtamasyz etý boiynsha is-sharalar josparlaryn ázirlep bekitti. Bizdiń áriptesterimizdiń qajyrly eńbeginiń arqasynda Qazaqstannyń otyn-energetika júiesi pandemiia soqqysyna tótep berdi. Virýsqa qaramastan, mamandar elimizdi qajetti energiiamen qamtamasyz ete otyryp, elektr stantsiialarynda, munai óńdeý zaýyttarynda, ken oryndarynda, basqa da óndiris nysandarynda jumysyn toqtatqan emes. Sonymen qatar, Ministrlik salany qoldaý maqsatynda birqatar sharalar qabyldady. Barshańyzǵa belgili, koronavirýstyń taralýy búkil álemdik energiia resýrstar naryǵyna eleýli áser etti. Osyǵan bailanysty biz ótken jyldyń óndiristik kórsetkishterine túzetýler engizýge májbúr boldyq», - dedi N. Noǵaev.
