KVI-ǵa qarsy vaktsinamen ekpe alǵan adamdar qan jáne onyń komponentteriniń donorlyǵynan 2 aptaǵa shettetiledi. Bul jaiynda QR Bas memlekettik sanitar dárigeri Erlan Qiiasovtyń jańa qaýlysynda aitylǵan, dep habarlaidy "Ult aqparat".
Qujatta immýnosýpressivti em qabyldaityn patsientterde jáne immýn tapshylyǵy bar patsientterde jetkilikti immýndyq jaýap damymaýy múmkindigi eskertiledi. Sondyqtan immýndyq júieniń jumysyn tejeitin preparattardy qabyldaý immýnogendiliktiń tómendeý qaýpine bailanysty vaktsinatsiiadan buryn jáne odan keiin kem degende 1 ai qarsy kórsetilim bolady. Jiti infektsiialyq jáne infektsiialyq emes aýrýlar ekpelerdi júrgizý úshin ýaqytsha qarsy kórsetilimder bolyp sanalady. Vaktsinatsiia saýyqqannan nemese remissiiadan keiin 2-4 aptadan keiin júrgiziledi. Jiti ishek aýrýlarynda vaktsinatsiia densaýlyq jaǵdaiy qalypqa kelgennen keiin jasalady.
«KVI-ǵa qarsy belsendiligi joiylǵan vaktsinalarmen (Hayat-Vax, QazVac, KoronaVak jáne basqalary) jáne vektorlyq vaktsinamen (Spýtnik V) ekpe alǵan adamdar qan men onyń komponentteriniń donorlyǵynan 2 aptaǵa shettetiledi. Tiri vaktsinalardy paidalanǵan kezde egilgen adamdar qan men onyń komponentteriniń donorlyǵynan 4 apta merzimge shettetiledi. KVI-diń jiti jáne sipmtom joq túri bar adamdar KVI-ǵa qarsy vaktsinatsiialaýǵa jatpaidy. KVI-dy qosa alǵanda, infektsiialyq aýrýmen aýyratyn naýqaspen bailanysta bolǵan adamdar karantin merzimi aiaqtalǵannan keiin egiledi. Bul rette, KVI-men aýyratyn naýqaspen óziniń kásibi qyzmetiniń túri boiynsha jeke qorǵanysh quraldarynda bailanysta bolatyn meditsina qyzmetkerleri jatpaidy», - delingen qaýlyda.
Sondai-aq qujatta vaktsinatsiialaý aldynda KVI-ǵa qarsy antidenelerdiń bolýyna skrining (IFT jáne PTR-zertteý) júrgizilmeitindigi atap kórsetiledi. KVI-diń kez kelgen túrimen aýyryp jazylǵan adamdardy saýyqqannan keiin jáne vaktsinatsiialaý aldyndaǵy jai-kúiin baǵalaýdy eskere otyryp, 6 aidan soń vaktsinatsiialaýdyń tolyq kýrsymen egý usynylady. Bul rette KVI-men aýyrǵandarǵa saýyqqannan keiin 3 aidan soń vaktsinatsiia júrgizýge jol beriledi.
Halyqty vaktsinatsiialaý aýmaqtyq meditsinalyq uiymdardyń egý pýnktterinde, arnaiy kontingentti vaktsinatsiialaý - tiisti vedomstvonyń qyzmet orny boiynsha júrgiziledi. Halyq úshin vaktsinatsiialaýdyń qoljetimdiligin arttyrý jáne egý protsesin jeńildetý maqsatynda jyljymaly egý pýnktterin nemese kóshpeli egý brigadalaryn uiymdastyrýǵa jol beriledi. Múgedekter qataryndaǵy múmkindigi shekteýli adamdardy vaktsinatsiialaý úshin KVI-ǵa qarsy vaktsinatsiialaýdy úige baryp júrgizý uiymdastyrylady. Immýndaýǵa jatatyn adamdardyń sanyna sáikes egý brigadalarynyń, meditsina qyzmetkerleriniń, onyń ishinde immýnologtardyń, jalpy praktika dárigerleriniń, terapevterdiń, orta meditsina personalynyń, meditsinalyq bilimi bar tirkeýshilerdiń qajetti sany, vaktsinanyń, basqa da shyǵys materialdarynyń, tońazytý jabdyǵynyń, avtokóliktiń sany esepteledi.
«Egý brigadasy árbir egý pýnktinde 1 brigadaǵa 300 ekpeden aspaityn kúndelikti júktemeni eskere otyryp qalyptastyrylady. Bul rette, 1 egý brigadasynyń quramyna: 1 dáriger, 1 egý meiirgeri jáne qajet bolǵan jaǵdaida 1 tirkeýshi kiredi. Aýyldyq jerlerde quramynda: 1 feldsher (dáriger bolmaǵan jaǵdaida), 1 egý meiirgeri, qajet bolǵan jaǵdaida 1 tirkeýshiden egý brigadasyn uiymdastyrýǵa jol beriledi», - delingen qujatta.
