Kvazimemlekettik sektor sýbektileriniń ekonomikadaǵy rólin qaita qaraý qajet. Bul týraly QR Parlamenti palatalarynyń birlesken otyrysynda Respýblikalyq biýdjettiń atqarylýyn baqylaý jónindegi esep komitetiniń tóraiymy Natalia Godýnova aitty, dep habarlaidy QazAqparat.
«Kvazimemlekettik sektorda júieli problemalar bar. Bul másele Parlamentte jan-jaqty jáne birneshe márte talqylandy. «Samuryq-Qazyna» qorynyń ózin qospaǵanda, olardyń aktivterin basqarýdyń aitarlyqtai jaqsarǵanyn ázirge aita almaimyz. Biyl Esep komiteti Prezident Ákimshiliginiń júie quraýshy holdingter men ulttyq kompaniialar qyzmetiniń tiimdiligine aýdit júrgizý jónindegi tapsyrmasyn oryndaý jumystaryn aiaqtaidy. Nátijesi qandai? Jalpyulttyq mindetterge qol jetkizýdegi árqaisysynyń rólin naqty anyqtai otyryp, olardyń qyzmetin strategiialyq josparlaýdy jetildirý mańyzdy dep sanaimyz. Kvazimemlekettik sektor sýbektileriniń ekonomikadaǵy rólin qaita qaraý qajet. Olar paida ákelip, jańa naryqtardyń ashylýyn týdyrýy kerek. Naryqtyq básekelestik qalyptasqan jerde tek qana jeke biznes damýy tiis», - dedi Natalia Godýnova.
Sonymen qatar ol boryshtyq júktemege baqylaýdy kúsheitý; dividendtik saiasatty reglamentteý; satyp alýdy qatań baqylaý; korporativtik basqarýdy jetildirý; beiindi emes aktivterden arylý, demek olardy kútip-ustaýǵa jumsalatyn qomaqty shyǵyndardy azaitý syndy júieli problemalardy sheshý qajettigin basa aitty.
«Birqatar kompaniiada mundai jumys bastalyp ketti. Biraq keibir normalardy zańnamalyq deńgeide bekitý kerek», - dedi komitet tóraiymy.
