Foto: ©️ Tengrinews.kz / Týrar Kazangapov
Jambyl oblysy Talas aýdanynda 25 jyl boiy qujatsyz ómir súrip kelgen er adamǵa qatysty sot protsesi júrip jatyr. Talas aýdandyq prokýratýrasynyń aryzy boiynsha er adamnyń qujattary rásimdelgen, - dep habarlaidy «Ult aqparat» Talas aýdandyq sotynyń baspasóz qyzmetine silteme jasap.
Talas aýdandyq sot baspasóz qyzmetiniń ókilderi kúdiktige bótenniń múlkin jasyryn jymqyrý saldarynan qylmystyq is qozǵalǵany týraly málimdedi, alaida onyń týý týraly akt jazbasy men jeke basyn anyqtaityn qujattary bolmaǵan.
"Tájikstan Respýblikasynyń Ádilet Ministrliginiń Kýbodin aýdany boiynsha Azamattardyń hal aktilerin tirkeý bóliminiń suratýǵa bergen jaýabynan, N.-niń týý týraly jazbasy jasalmaǵany anyqtaldy. Sotta kýáler N. olardyń týǵan aǵasy ekenin rastap, ol Qazaqstan Respýblikasynyń Ońtústik-Qazaqstan oblysy Shardara aýdany Birlik aýylynda týylǵanyn jáne sonda birge turǵandaryn aitqan. Alaida ákeleri qaitys bolǵan soń, olar analarymen birge Tájikstan Respýblikasyna ketip qalǵanyn, al aǵalary N. qujattary bolmaǵandyqtan, Qazaqstanda qalyp ketkenin aitqan", - delingen Jambyl oblystyq sotynyń saitynda.
Azamattyń qujattardy basqa jolmen alýǵa múmkindigi bolmaǵan, sebebi ol meditsinalyq uiymnan tys jerde týylǵan jáne onyń týylǵan deregi tiisti tártippen tirkelmegen, meditsinalyq uiymmen belgilengen úlgidegi týý týraly anyqtama berilmegen. Mundai jaǵdaida, sot, sot otyrysy barysynda anyqtalǵan istiń naqty mán-jailaryn nazarǵa alyp, qoiylǵan talapty qanaǵattandyrý týraly tujyrymǵa keldi.
"Sheshim zańdy kúshine endi. Onyń negizinde, azamattyń týý týraly akt jazbasy jazylyp, oǵan týý týraly kýáligi men jeke kýáligi berilgen", - delingen habarlamada.
Jambyl oblystyq sot baspasóz qyzmetiniń ókili Ainash Mahambetovanyń aitýynsha, er adam Qazaqstan azamaty, bizdiń elde dúniege kelgen, alaida qujattaryn rásimdemegen. Oǵan QR Qylmystyq kodeksiniń 188-baby, iaǵni urlyq jasaý faktisi aiyp taǵylǵan.
