QR IIM TJK tóraǵasynyń orynbasary Barat Tuzaqbaev kúzgi jiym-terimnen keiin salǵyrttyq pen abaisyzdyqtyń saldarynan aýqymdy aýmaqtarda qurǵaq shóptiń órtenip jatqanyn málim etti, dep habarlaidy QazAqparat.
«Sońǵy kúnderi kún jyly bop tur. Saiajaidaǵy adamdar, qojalyqtaǵy sharýalar bolsyn kúzgi baqshasy men eginin jinap alǵannan keiin kelesi jylǵa jerin daiyndaityny belgili. Sol kezde qalǵan sabanyn, shóbin jaǵyp jiberedi. Al dala jeldi bolsa, dál osyǵan kelgende órt qaýpiniń týyndaý yqtimaldyǵy artady. Aqyry, órt tutas aýqymdy aýmaqtardy alyp ketip jatqan jaǵdailar kezdesýde. Mine, osyndai qaýipterdiń aldyn alý úshin qazirgi ýaqytta nasihat jumystaryn júrgizip jatyrmyz», - dedi ol elordada ótken baspasóz máslihaty barysynda.
Komitet ókiliniń aitýynsha, 7 qazanda elimizdiń 4 óńirinde qurǵaq shóp janǵan. Atap aitqanda, keshe túste Qaraǵandy qalasyndaǵy Qazybek bi aýdany «Mir» jáne «Lých» saiajai qoǵamdarynyń aýmaǵynda qoqystar, aǵash dýal órtenip, qyzyl jalyn aqyry 45 saiajai ýchaskesindegi qurǵaq shópke ulasqan. «Órttiń sebebi – salǵyrttyq» deidi komitet ókili. Der kezinde qolǵa alynǵan sharalardyń arqasynda tilsiz jaý der kezinde aýyzdyqtalǵan. Sol sekildi, saǵat 13:33-te BQO Oral qalasy Jelaev kentinde qurǵaq shóp janyp, órt Terekti aýdany Áitiev aýylyndaǵy jáne Báiterek aýdany Jaiyq-2 aýylyndaǵy orman alqabyna ulasqan.
Saǵat 14:50-de Báiterek aýdanynda Ozernyi kentinen 21 shaqyrym jerde qurǵaq shóp, butalar men orman alqaby órtenip, jergilikti atqarýshy organdardyń kúshimen Sholpan aýylynan Rýbejka aýylyna 30 adam evakýatsiialanǵan. Órt 8 qazanda saǵat 11:01-de aýyzdyqtalyp, órtti sóndirýge TJD, PD, Orman sharýashylyǵy, EÓQ (barlyǵy 107 qyzmetker men 17 birlik tehnika) jumyldyrylǵan.
Sonymen birge, saǵat 14:06-da Aqmola oblysynyń Býrabai aýdanynyń Naýryzbai batyr aýylynda 42 ga alqapta qurǵaq shóptiń janǵany habarlanyp otyr. Odan bólek, ShQO Kúrshim aýdanynyń Boran aýyldyq okrýgindegi Jideli aýylynda 180 ga alqapta qurǵaq shóp, sonymen qatar 22 tonna kóleminde daiyndalǵan shóp órtenip ketken. Órt búgin tańerteń saǵat 06:50-de ǵana aýyzdyqtalǵan.
