Strategiialyq josparlaý jáne reformalar agenttiginiń tóraǵasy Qairat Kelimbetov 2021 jyly halyq sanaǵy qalai ótetinin aityp berdi, dep habarlaidy QazAqparat.
29 qańtarda Reformalar jónindegi joǵary keńestiń úshinshi otyrysynda Memleket basshysy Qasym-Jomart Toqaev halyq sanaǵyn qazan aiynda ótkizýdi tapsyrǵan edi.
«Prezident janyndaǵy Reformalar jónindegi joǵary keńestiń sheshimimen halyq sanaǵy biyl ótedi. 2021 jylǵy jańa sanaqtyń ereksheligi – zamanaýi tsifrlyq tehnologiialardy engizý men protsesti avtomattandyrý. Endi halyqtan málimet jinaý eki túrli tásilmen júrgiziledi. Birinshi tásil – https://sanaq.gov.kz/ arnaiy saitynda internet-saýalnama júrgizý, onda virtýaldy kómekshi arqyly respondentter qai jerde ornalasqanyna qaramastan derbes sanaqtan ótýge jáne ózi men otbasy múshelerine sanaq paraqtaryn toltyrýǵa múmkindik alady», - dep atap ótti Qairat Kelimbetov Úkimettiń búgingi otyrysynda.
Ekinshi tásil – qajetti sanitarlyq normalardy saqtai otyryp, dástúrli úi-úidi aralaý. Aralaý onlain rejimde sanaqtan ótpegen respondentter arasynda júrgiziledi.
«Interviýerlerdiń jappai aralaý kezinde elektrondyq planshetterdi paidalanýy da jańalyq bolyp otyr, bul planshetter keiin tiisti óńirlerdegi mektepterge beriledi. Úilerdi aralaý 1-30 qazan aralyǵynda ótedi. Qazirgi ýaqytta ulttyq sanaqty ótkizý jónindegi is-sharalar jospary múddeli memlekettik organdarǵa jáne oblystardyń ákimdikterine kelisýge jiberildi», - dep túsindirdi Q. Kelimbetov.
