Biylǵy jyldyń kúz ben qys mezgilderinde elimiz boiynsha 16 adam qaitys boldy, onyń ishinde 5 bala bar, dep habarlaidy "Ult aqparat" QR Tótenshe jaǵdailar ministrliginiń baspasóz qyzmetine silteme jasap.
Baspasóz qyzmetiniń málimetterine qaraǵanda, ministrliktiń aýmaqtyq bólimsheleri sý aidyndarda adamdardyń (balyqshylardyń) qaza bolýynyń aldyn alý boiynsha reid jáne profilaktikalyq is-sharalar ótkizedi. Reid barysynda balyq aýlaý kezindegi qaýipsizdik sharalaryn saqtaý týraly aqparattyq jadynamalar taratylady.
Máselen, 2020 jylǵy 9 jeltoqsanda TJ ministrliginiń jáne Nur-Sultan qalasy TJ departamentiniń qyzmetkerleri, volonterler áýesqoi balyqshylar arasynda Nur-Sultan qalasynyń sý aidyndaryndaǵy kezekti profilaktikalyq, reidtik is-shara ótkizdi. Is-shara barysynda Apattar meditsinasy ortalyǵy qyzmetkerleri is júzinde zardap shekken adamǵa kórsetý tásildermen tanystyrdy. Muz astyna túsip ketken adamdy qutqarý kezindegi is-qimyldarda da pysyqtaldy.
Jalpy respýblika boiynsha Tótenshe jaǵdailar departamentteri Politsiia departamentterimen birlesip, balyq aýlaý oryndarynda, muz ústimen ótetin jerlerde patrýldeý, aralaý jumystary jáne reidterdi turaqty júrgizip keledi. Kúz-qys mezgilinde 4 512 patrýldeý jáne reid ótkizildi, sýdaǵy júris-turys qaǵidalaryn saqtaý boiynsha 15 769 nusqaýlyq berildi.
Kún saiyn qaýipti sý aidyndarynda, muzdyń qalyńdyǵyn baqylaý jumystary júrgiziledi. Ol jerlerde 1 095 eskertý belgisi ornatylǵan.
Aǵymdaǵy jylǵy 1 jeltoqsandaǵy jaǵdai boiynsha sý aidyndaryndaǵy muzdyń qalyńdyǵy:
- soltústik óńirde - 5-8 sm.;
- batys óńirde - 1-3 sm.;
- ortalyq óńirde - 10-12 sm.;
- shyǵys óńirde - 25-30 sm.;
- ońtústik óńirde - 3-4 sm.
Ań jáne balyq aýlaý maýsymy bastalǵannan beri (2020 jylǵy 1 qazan-7 jeltoqsan) eldiń sý aidyndarynda 16 adam, onyń ishinde 5 bala qaza tapty.
Balyq aýlaý kezinde erejelerdiń buzylýynan 11 adam qaza tapty jáne eresek adamdardyń qaraýynsyz qalǵan 5 bala abaisyzda sýǵa qulap, sýǵa batyp ketti.
Aǵymdaǵy jyly qaza bolǵandar Aqmola (5 adam), Almaty (3 adam, onyń ishinde 2-eýi bala), Jambyl (2 bala), Qostanai (2 adam), Qyzylorda (2 adam), Mańǵystaý (1 bala), Túrkistan (1 bala) oblystarynyń sý aidyndarynda tirkeldi.
Máselen, ótken kúz jáne qys maýsymynda (2019 jylǵy 1 qazannan bastap 2020 jylǵy 1 naýryzǵa deiin) elimizdiń sý aidyndarynda balyq aýlaý kezinde qaýipsizdik erejelerin buzý saldarynan, sondai-aq muz ótkelderi arqyly ótý kezinde 37 adam (onyń ishinde 10 bala) qaza boldy. Adamdardyń qaza bolýynyń negizgi sebepteri:
1) 19 adam balyq aýlaý kezinde (jaǵalaýdan jáne/nemese júzý quraldarynan) sýǵa qulaǵan;
2) 7 adam balyq aýlaý kezinde muz astyna qulap ketken;
3) oinap júrip 8 bala muz astyna túsip ketken, 2 bala sýǵa qulaǵan;
4) 1 adam muz ótkelderi arqyly ótý kezinde qulaǵan.
Aýmaq boiynsha alyp qarasaq, qaza bolǵandar Aqmola, Atyraý, Almaty, Aqtóbe, Shyǵys-Qazaqstan, Jambyl, Batys-Qazaqstan, Qostanai, Qaraǵandy, Soltústik Qazaqstan oblystarynyń jáne Almaty qalasynyń sý aidyndarynda tirkeldi.
Osyǵan bailanysty, el azamattaryn tómendegidei qaýipsizdik erejelerin saqtaýǵa shaqyramyz:
1) táýliktiń qarańǵy ýaqytynda jáne nashar kóringen kezde muzǵa shyqpańyz;
2) muzdyń juqa jáne qatpaǵan jerlerimen júrmeńiz;
3) muzdyń jekelegen bóliginde toptasýǵa bolmaidy;
4) muzdaǵy shuńqyrlarǵa, jaryqtarǵa, oiyqtarǵa jaqyndamańyz;
5) avtomobildermen ótkelderden tys jerlerge shyqpańyz.
«Muz astynan balyq aýlaýǵa bolmaidy, balyqty jeke qutqarý quraldary bolǵan jaǵdaida ǵana aýlaý qaýipsiz. Sondai-aq shekteýli alańda ekiden kóp shuńqyr tesýge jáne ot jaǵýǵa jol berilmeidi, adamdar ótetin jerlerge balyq aýlaýǵa arnalǵan jelilerdi ornatýǵa jáne shuńqyrlardy tesýge bolmaidy.
Bir adam úshin muzdyń qaýipsiz qalyńdyǵy keminde 10 sm. jaiaý ótkeldi jasaý úshin muzdyń qaýipsiz qalyńdyǵy 15 sm jáne odan astam bolýy kerek. Avtomobilderdiń ótýi úshin muzdyń qaýipsiz qalyńdyǵy keminde 30 sm bolýy kere», - delingen habarlamada.
