Biz sheteldik ánshilerdiń aldynda iilýge mindetti emespiz. Qazaqstandyq juldyzdardy sheteldikterden tómendetkendi qoiý kerek. Osylai dep ashýlandy tanymal prodiýser Alýa Qonarova. Jýyrda prodiýserdiń toby qazaqstandyq kontsert uiymdastyrýshylardyń qurbany bolǵan eken. Áriptesiniń bul sózin Sáken Maiǵaziev pen ózge juldyzdar da qoshtai tústi. Bul týraly Astana arnasynyń "El aýzynda" baǵdarlamasynda aityldy, dep jazady Sputnik agenttigi.
Syrttan kelgen ártisterdiń aldynda qurdai jorǵalaý kontsertterde ǵana emes, jeke keshterde de kórinis tabady. Qazaqstandyq uiymdastyrýshylar olarǵa birneshe million gonorar tóleidi. Sondai-aq, taýdai talaptaryn da oryndaidy. Sáken Maiǵaziev osy oraida bolǵan oqiǵany baiandap berdi. Birde sheteldik ánshi ózine limon dámi qosylmaǵan qorqor ákelmeiinshe, sahnaǵa shyqpaimyn dep qorqytqan eken.
"Álgi ánshiniń raideriniń ishinde qorqor bolǵan. Qorqor dep otyrǵanym kalian. Bir ýaqytta daiashylar oǵan qarbyz dámi qosylǵan qorqor alyp keledi. Sonda sheteldik ánshi "Meniń raiderimde limon dámi qosylǵan qorqor bolýy kerek dep jazylǵan. Kelisimshartty buzdyńdar. Men sahnaǵa shyqpaimyn" dep tórt tabandap jatyp alǵan. Sol jerde qazaqstandyq uiymdastyrýshylar júgirip júrip aiyppulyn tólep, limon qosylǵan qorqoryn ákelip bergen. Juldyz osydan keiin ǵana sahnaǵa shyqqan. Qandai sorlylyqqa túsip kettik?! Men osy nársege tańǵalamyn", — dedi ánshi.
Ári qarai Maiǵaziev qazaq ánshileriniń dál bulai erkelei almaitynyn aityp ashyndy. Tipti, sý surasa tilegin oryndamaityn uiymdastyrýshylar bolady eken.
"Al qazaq ánshileri jái sý surasa bastary bálege qalady. Uiymdastyrýshylarǵa baryp "Maǵan kofe berińiz" dep aityp kórińiz, "Óziń úiden tamaq iship kelmeisiń be?!" dep jaýap qaitarady. Aýyldaǵynyń aýzy sasyq degen sóz bar. "Erterek kelip otyrsyn, bastysy aqshasyn tólep qoidyq" deidi otandyq ánshilerge. Al sheteldikterdiń týfliin jalap, áspettep, ne aitsa, sony oryndaidy. Bylaiynsha aitqanda quiyrshyq bolyp júrgenimiz uiat nárse", — dedi Sáken Maiǵaziev.
Taǵy bir ánshi Erdos Qanaevtyń aitýynsha, qazaqstandyq ártister mundai raiderdi tipti armandai almaidy. Olar halyqaralyq deńgeidegi kontsertke qatysqandaryna máz.
"Qazaqtyń ánshileri mundaidy qaitip aitsyn?! Mysaly, mundai kontsertterge bireýi ilikse, ekinshileri ilikpei qalyp jatady. Árine, Roza sekildi apailarymyzdyń bári jaǵdaiyn jasaidy. Dese de, munyń barlyǵy bizde shoý-biznestiń kenjelep qalǵany dep oilaimyn. Bul jerde bireýdi kinálaǵym kelip turǵan joq. Tek bizde shoý biznes jaqsylap damymaǵan", — dedi Erdos Qanaev.
Al Sáken Maiǵaziev bul nársege qazaqtyń ózin kinálaidy. Aitýynsha, qazaq ánshilerin kemsitetin uiymdastyrýshylarmen de jolyqqan.
"Munyń bárine bizdiń tapsyrys berýshiler men prodiýserler kináli. Mysaly, Reseidiń tanymal ánshisin shaqyrý úshin 50 myń eýro tóleitin kezderi bolady. "Jaraidy, shaqyraiyq, aldyraiyq" deidi. Al Ameriadan aldyrsaq qansha bolady eken? Baǵasyn estise, "a, qymbattaý" deidi. Amal joq Qazaqstandaǵy kontsertterge aýyldan aǵaiyn-týysqan, kempir-shaldar keledi. Iaǵni mundaida "Mýzart" sekildi toptardy shaqyrady. Sonda gonorarymyz 5 myń dollar ekenin estigende "Bularǵa ne joq?" dep aitady eken", — dedi ánshi.
Taǵy bir qazaqstandyq ánshi Mádina Sádýaqasova kerisinshe sheteldikterden qurmetimizdi aiamaýdy suraidy. Aitýynsha, ózderin de sheteldikter erekshe yqylaspen qarsy alyp, raiderde jazylǵan kelisimnen de artyq qoshemet kórsetedi eken.
"AQSh memleketine kontsert qoiý úshin barǵanym esimde. Sol kezde olardyń óner adamyna erekshe qurmet kórsetetinderin baiqadym. Mysaly, Mońǵoliia eline de barǵan edim. Ol jaqtyń adamdary sondai qarapaiym. Olar, tipti, seniń raiderińde jazylǵan talaptardan da asyp túskisi kelip turady. Sol sekildi Túrkiia elinde de "sanadji" dep asty-ústińe túsip jatady. Meniń oiymsha, bul nárse barlyq elde bar. Oǵan renjip jatýdyń esh qajeti joq dep oilaimyn", — dedi Mádina Sádýaqasova.
Jýyrda tanymal prodiýser Alýa Qonarova kerisinshe qazaqstandyq uiymdastyrýshylardyń qurbany bolǵan eken. Sol sebepti ol Mádina Sádýaqasovanyń pikirimen kelispeidi. Ashýǵa mingen ol qazaqstandyq juldyzdardy sheteldik ánshilermen qatar qoiyp, qurmetteýdi surady. Al bulai bolmaǵan jaǵdaida, jobalary esh shaqyrtýǵa barmaitynyn aityp qorqytty.
"Qymbatty kontsert uiymdastyrýshylary, qazaq ártisteriniń daiyndyǵyna sheteldik juldyzdardikimen birdei ýaqyt bermeseńizder, meniń jobalarym sizderdiń keshterińizge qatyspaidy. Sahna ortaq. Olardyń raideri men talaptaryn qalai oryndasańyzdar, bizdikine de solai qarańyzdar. Ózimizdiń juldyzdardy tómendetkendi qoiý kerek. Óz boilaryńyzdaǵy kompleksterińizben kúresińizder. Biz sheteldikterdiń kishi inisi emespiz. Olarǵa iilýge mindetti emespiz", — dedi Alýa Qonarova.
Al, Siz qurmetti oqyrman, bul jaǵdaiǵa qatysty ne deisiz? Qazaqstandyq kontsertterge qyrýar aqsha tólep sheteldik juldyzdardy shaqyrǵan durys pa?
