Búgingi tańda 80 jyldan astam tarihy bar ónerdiń qara shańyraǵy Almaty Memlekettik qýyrshaq teatry 2017 jyldyń 5 qazan kúni saǵat 16.30-da saltanatty túrde kezekti 83-shi maýsymyn ashady. Atalmysh mereke teatr artisteriniń qatysýymen teatr fasadyndaǵy aqyn, dramatýrg Iran-Ǵaiyptyń «Bóshke» dramasynyń negizinde rejisser R.Janyamanov sahnalaǵan kórinispen bastaý alady.
Sondai-aq, saǵat 17.00-de Evgenii Ionovtyń «Ana júregi» spektakliniń premerasy kórermen nazaryna usynylady. Qoiýshy rejisseri – Anton Zaitsev. Qoiýshy sýretshisi – Sergei Meltsev. Sahnalyq biin qoiǵan – Gúljan Dáýletqulova. Atalmysh qoiylym arqyly rejisser A.Zaitsev qýyrshaq teatry sahnasyna jańa lep ákeldi. Pesanyń mazmuny aýyr bolǵanymen, beretin tárbiesi mol. Kez kelgen jastaǵy kórermenniń kóńilin oiatyp, júregine iman uialatpaq. Anadan týǵan jalǵyz ul joqshylyqty mise tutpai, ar kórip, anasyna qarsy shyǵady. Tas qalanyń tas júrek jastaryna qosylǵan jetesiz ul, ulym dep eńiregen ananyń kózjasy qoiylymnyń basty ideiasyn ashyp kórsetpek. Balasynyń týǵan kúnine qolynda qalǵan jalǵyz janyp turǵan balaýyz shyraqty syiǵa tartpaq bolǵan ana júregi sol shyraqpen birge sónedi. Rejisser Anton Zaitsev osy bir shynaiy ómirdi qýyrshaq sahnasynda qýyrshaq tilinde sóiletpek.
Ana beinesinde – aktrisa Tolqyn Tleýlieva, qýyrshaq bala – akter Rúslan Abý jáne kópshilik sahnada teatr artisteri óner kórsetedi.
82-ShI MAÝSYM JETISTIKTERI:
Almaty Memlekettik qýyrshaq teatry búgingi tańda ár baǵytta, ár janrda jumys jasap keledi. Biylǵy jyl teatr úshin erekshe shyǵarmashylyqqa toly jyldyń biri boldy. Óner ordasy kezekti eńbek demalysynda 82-shi maýsymyn jappastan úzdiksiz jumys atqaryp, óz kórermenderin kúndelikti qoiylymdarymen qaýyshtyrdy. Maýsym barysynda 4 memleketke joldama alyp, tómende kórsetilgen halyqaralyq teatr festivalderine qatysty:
- 25-29 mamyr aralyǵynda Bishkek qalasynda (Qyrǵyzstan) ótken dramatýrg, rejisser qýyrshaq teatrlarynyń negizin salýshy Viktor Aleksandrovich Shvembergerdiń 125-jyldyǵyna orai II Halyqaralyq «Tak-teke» qýyrshaq teatry festivalinde rejisser Qýbanychbek Adilov sahnalaǵan A.P.Chehovtyń «Kashtanka» qoiylymymen qatysyp, «Klassikalyq shyǵarmany qýyrshaq janrynda kórsetkeni úshin» jáne «Eń úzdik rejissýra» nominatsiiasyn ielendi;
- 28 mamyr Moldaviia eli, Kishinev qalasynda ótken «Pod shapkoi Gýgýtse» Halyqaralyq qýyrshaq teatrlary festivaline rejisser, Qazaqstannyń eńbek sińirgen artisi Q.Eshmuratova sahnalaǵan «Qańbaq shal» qoiylymyn 25 memleketten kelgen óner ókilderine kórsetip, «Ulttyq dástúrdi nasihattaǵany úshin» jáne teatr direktory Esenaliev Talǵat «Úzdik menedjer» diplomymen marapattaldy;
- Maýsym aiynda Tatarstan qalasyndaǵy ótken HIII túrki halyqtarynyń «Naýryz» festivaline dramatýrg Álibek Faizýllaulynyń «Altyn adam» (rej.: Iu.Ýtkin) epikalyq spektaklimen qatysyp, arnaiy diplommen marapattaldy;
- 28 shilde men 7 tamyz aralyǵynda Ankara qalasynda (Túrkiia) ótken Halyqaralyq teatr festivaline «Qýyrshaq dýman» (rej.: Q.Eshmuratova) qoiylymymen qatysyp, Qazaqstan Respýblikasynyń Túrkiia Respýblikasyndaǵy elshisiniń atynan «Qazaqstan men Túrkiia arasyndaǵy diplomatiialyq qarym-qatynastardyń 25 jyldyǵy aiasynda Túrkiia Respýblikasynda qazaq mádenieti men ónerin tanytýǵa qosqan úlesi úshin» atty arnaiy alǵys hatpen marapattaldy.
Festivalder barysynda teatr ujymy festival qatysýshylarymen jan-jaqty tájiribe almasyp, búgingi kúnde balalar taqyrybynda jazylǵan pesalardy talqylap, kásibi teatr mamandary uiymdastyrǵan sheberlik-saǵattaryna qatysty.
Sonymen qatar, elordamyz Astana qalasynda ótken «EXPO-2017» mamandandyrylǵan Halyqaralyq kórmesin ilgeriletý maqsatynda Almaty qalasy mádeniet jáne arhivter basqarmasynyń qoldaýymen Almaty Memlekettik qýyrshaq teatry maýsym aiynyń 12-16 juldyzy aralyǵynda astanalyq kishkentai kórermenderge teatr repertýaryndaǵy M.Polivanovanyń «Kóńildi qonjyqtar» (rej.: V.Berkin, G.Iliiasova), J.Omarovtyń «Qulynshaq pen bóltirik» (rej.: R.Janyamanov) qiial ǵajaiyp ertegisin tartý etti. Qoiylymdar qazaq jáne orys tilinde júrdi.
2017 jyldyń 2-8 qyrkúiek aralyǵynda Astana qalasynda ótken Qairat Súgirbekov atyndaǵy I Respýblikalyq jas rejisserlerdiń forým-festivaline rejisser Rústem Janyamanov sahnalaǵan J.Omarvtyń «Qulynshaq pen Bóltirik» ertegisimen qatysyp, teatr ujymy arnaiy diplommen marapattaldy.
«Rýhani jańǵyrý» baǵdarlamasy aiasynda teatr ujymy sáýir aiynyń 9-13 kúnderi aralyǵynda Taldyqorǵan qalasynda, qyrkúiek aiynyń 11-13 kúnderi aralyǵynda Kókshetaý, 14-17 kúnderi aralyǵynda Astana qalasynda óziniń kezekti gastroldik saparyn ótkizedi.
83-ShI MAÝSYM JOSPARY:
Qazan aiynyń 20-24 aralyǵynda Túrkiia elinde ótetin III Halyqaralyq teatr festivaline «Arystannyń úreiin qalai emdeý kerek?» (avt.: M.Dlgecheva, rej.: E.Toteva-Andotova) jáne «Qýyrshaq dýman» (avt. jáne rej.: S.Shúkirov, Q.Eshmuratova) qoiylymdarymen qatysýdy josparlap otyr.
Jańa maýsymda teatr ujymy rejisser R.Otarbaevtyń «Saǵynysh shóbi», E.Jýasbektiń «Toba» qoiylymdaryn, B.Joraevtyń «Batyr men Alabai», «Qoja men sport», I.Saparbaidyń «Syǵan serenadasy», A.Gofmannyń «Shelkýnchik» atty týyndylaryn kishkentai kórermenderge sahnalap, tartý etpek.
Atalmysh óner ujymynyń qashan da izdenis ústinde ekendigin teatrdyń búgingi tynysynan baiqaimyz. Sahnalanǵan jańa qoiylymdardy arnaiy teatr synshylarynyń saraptamasynan ótkizýdi áste daǵdyǵa ainaldyrǵan.
